३० प्रतिशत बोनस सेयर र लाभांश वितरण गर्ने नबिल बैंकको घोषणा

काठमाडौं । नबिल बैंक लिमिटेडले आफ्नो सेयरधनी सदस्यलाई ३० प्रतिशत बोनस सेयर र नगद लभांश वितरण गर्ने भएको छ । बैंकका उपाध्यक्ष उपेन्द्र प्रसाद पौड्यालको अध्यक्षतामा सम्पन्न साधारण सभाले आफ्ना सेयरधनी सदस्यलाई लाभांश वितरण गर्ने निर्णय गरेको हो । 

आफ्ना सेयरधनी सदस्यलाई १८.५ प्रतिशतका दरले बोनस सेयर र ११.५ प्रतिशतका दरले नगद लाभांश वितरण गर्न लागेको बैंकले जनाएको छ । बैंकका अनुसार सञ्चालक समितिले सिफारिस गरेअनुसार र नेपाल राष्ट्र बैंकको स्वीकृति अनुसार आव २०७८/७९ सम्मको सञ्चित मुनाफा तथा अन्य वितरण योग्य कोषबाट बोनस सेयर र नगद लाभांश वितरण गर्न लागेको हो । 

३८ वर्ष देखि गुणस्तरीय बैंकिङ सेवा प्रदान गर्दै आइरहेको बैंकले यस वर्ष पनि ‘क’ वर्गको बैंकहरुमध्ये उच्चतम लाभांश दिँदै नेपालको अग्रणी वाणिज्य बैंकको पहिचानलाई निरन्तरता दिन सफल भएको छ ।

सभाले संस्थापक शेयरधनी समूह तर्फका ३ पदको लागि भएको निर्वाचनमा निर्वाण चौधरी, मलय मुखर्जी र ए.आर.एम. नजमुस शकिबलाई सञ्चालक निर्वाचित गरेकाे छ । बैंकले आव. २०७८/७९ मा निजी क्षेत्रका बैंकहरुमध्ये उच्चतम मुनाफा ४ अर्ब २५ करोड ६० लाख रुपैयाँ हासिल गर्न सफल भएको छ । समीक्षा वर्षको मुनाफाबाट प्रस्तावित बोनस शेयर पश्चात यस वर्ष चुक्ता पूँजी २७ अर्ब नाघेको बेंकले जनाकारी दिएकाे छ ।

बैंकले नेपालको बैंकिङ क्षेत्रलाई आधुनिकीकरण गर्न, देशको व्यावसायिक एवं औद्योगिक गतिविधिहरूलाई गतिशीलता प्रदान गर्न र रोजगारीका अवसरहरू सिर्जना गर्न र सहयोगीको भूमिका निर्वाह गर्न सफल भएको सभाका अध्यक्ष पौड्यालले बताए । उनले बैंकको संस्थागत सुशासन र ग्राहक सन्तुष्टिलाई उच्च प्राथमिकतामा राखेर काम गरेको बताउँदै आगामी दिनमा निरन्तरता दिने प्रतिवद्धता गरे ।

बैंकले स्थापनाकालदेखि हालसम्म १९ अर्ब भन्दा बढी रकम करको रूपमा देशालाई प्रदान गरिसकेको छ । बैंकले हाल २४० वटा शाखाहरू, २७५ वटा एटिएम र ८ वटा रेमिट एजेन्टहरूका साथमा देशव्यापी रूपमा र विश्वभर धेरै एजेन्टहरूमार्फत सेवा प्रदान गर्दै आएको छ ।