ऊर्जा खबर
काठमाडौं । दोर्दी खोला जलविद्युत कम्पनीको वार्षिक साधारणसभा माघ ९ गते हुने भएको छ । कम्पनीको गत पौष १२ गते बसेको सञ्चालक समितिको बैठकले साधारणसभाको मिति तय गरेको हो ।
साधारणसभाले आर्थिक वर्ष २०७५/७६ र २०७६/७७ को वासताल तथा नाफा नोक्सान हिसाब र नगद प्रवाह विवरणमाथि छलफल गरी पारित गर्ने कम्पनीले जनाएको छ । साधारणसभाले लेखापरीक्षण समितिको सिफारिस बमोजिम चालू वर्षका लागि लेखा परीक्षक नियुक्त गर्ने तथा पारिश्रमिक निर्धारण गर्ने भएको छ ।
साधारणसभाले लमजुङमा निर्माणाधीन १२ मेगावाटको दोर्दी–१ जलविद्युत आयोजनाको लागि थप ऋण प्रस्ताव अनुमोदन गर्ने भएको छ । साथै, सर्वसाधारणका लागि सेयर निष्काशन गर्ने प्रस्ताव पनि अनुमोदन गर्ने कार्यसूची छ । साधारणसभा बिहान ११ बजेदेखि भर्चुअल (जुम मिटिङ) माध्यमबाट हुने कम्पनीले जनाएको छ ।
कम्पनीले निर्माण गरिरहेको आयोजना अन्तिम चरणमा पुगेको छ । आयोजना पूरा भएपछि उत्पादन हुने विद्युत ३ किलोमिटर दुरीमा निर्माणाधीन किर्तीपुर सबस्टेसनमा जोडिनेछ । आयोजना सम्पन्न गर्न २ अर्ब २९ करोड रुपैयाँ लागत अनुमान गरिएको छ । आयोजनामा सानिमा बैंकको अगुवाईमा ५ बैंकले ऋण लगानी गरेका छन् ।
