ऊर्जा खबर
काठमाडौँ । सौर्य ऊर्जा उत्पादकहरूको संस्था, नेपाल (सोपान) ले वातावरणीय प्रभाव मूल्याङ्कन (इआइए) प्रतिवेदन तयार पार्नुपर्ने सौर्य विद्युत् आयोजनाको क्षमताको थ्रेसहोल्ड बढाउने कार्यको स्वागत गरेको छ । संस्थाले आइतबार विज्ञप्ति जारी गरी वन तथा वातावरण मन्त्रालयले वातावरण संरक्षण नियमावली–२०७७ को अनुसूची–३ को खण्ड (च) को उपखण्ड (६) को क्रम सङ्ख्या (क) मा गरेको संशोधनको स्वागत गरेको हो ।
मन्त्रालयले असोज २३ गते राजपत्रमा सूचना प्रकाशित गरी पहाडी क्षेत्रमा ५० मेगावाटभन्दामाथि र तराई क्षेत्रमा ४० मेगावाटभन्दा माथिका सौर्य विद्युत् आयोजना निर्माण गर्दा मात्रै इआइए प्रतिवेदन तयार पारी स्वीकृत गराउनुपर्ने नयाँ व्यवस्था गरेको छ । यसअघि जुनसुकै भौगोलिक क्षेत्रमा १० मेगावाट माथिका सौर्य विद्युत् आयोजना निर्माण गर्दा इआइए तयार गर्नुपर्ने व्यवस्था थियो ।
मन्त्रालयले नियमावलीमा गरेको संशोधन अनुसार अब हिमाली क्षेत्रमा ५० मेगावाटसम्म र तराईमा ४० मेगावाटसम्मका सौर्य विद्युत् आयोजना निर्माण गर्दा प्रारम्भिक वातावरणीय अध्ययन प्रतिवेदन (आइइई) मात्र तयार गरे पुग्ने भएको छ ।
ऊर्जा, जलस्रोत तथा सिँचाइ मन्त्री कुलमान घिसिङसँग भेट गरी असोज १० गते थ्रेस होल्ड बढाउन माग गरेकोमा संस्थाको माग सम्बोधन भएको भन्दै सोपानले खुसी व्यक्त गरेको छ । ‘नियमावलीमा संशोधन गरी थ्रेसहोल्ड बढाएर सरकारले सौर्य विद्युत् आयोजनामा रहेको अनावश्यक नियामकीय बोझ हटाएको छ,’ सोपान अध्यक्ष सन्दीप शाहले भने, ‘सौर्य क्षेत्रमा समयमै लगानी र विकासमा अवरोध उत्पन्न गर्ने असमान व्यवहारलाई सरकारले सच्याएको छ ।’
यो नयाँ व्यवस्थाले सौर्य विद्युत् आयोजनाको लागत घटाउने, विकासमा लाग्ने समय कम गर्ने, सौर्य विद्युत्लाई पनि समान अवसर प्रदान गर्ने, यस क्षेत्रमा लगानी आकर्षण गर्ने सोपानले उल्लेख गरेको छ ।
