ऊर्जा खबर
काठमाडौँ । संखुवासभामा प्रस्तावित १०६३ मेगावाटको माथिल्लो अरुण जलविद्युत् आयोजनामा लगानी गर्ने विषय विश्व बैंकको प्राथमिकतामा रहेको वैंकका दक्षिण एशिया क्षेत्रीय निर्देशक पङ्कज गुप्ताले बताएका छन् । ऊर्जा, जलस्रोत तथा सिँचाइ मन्त्री दीपक खड्कासँग बिहीबार सिंहदरबारस्थित ऊर्जा मन्त्रालयमा भएको भेटवार्ताका क्रममा उनले यस्तो बताएका हुन् ।
नेपाल विद्युत् प्राधिकरणको सहायक कम्पनी अप्पर अरुण हाइड्रो–इलेक्ट्रिक लिमिटेडले प्रवर्द्धन गरिरहेको आयोजनामा हालसम्म वित्तीय व्यवस्थापन हुन सकेको छैन ।
भेटमा विश्व बैंकले नेपालका जलविद्युत् क्षेत्रमा गरेको लगानीका विषयमा छलफल भएको थियो । छलफलका क्रममा ऊर्जा मन्त्री खड्काले नेपालका जलविद्युत् आयोजनामा विश्व बैंकले हालसम्म गरेको लगानीप्रति धन्यवाद दिँदै माथिल्लो अरुणमा लगानी गर्ने विषय चाँडो टुङ्गोमा पुर् याउन आग्रह गरेका थिए ।
त्यस्तै, विद्युत् आपूर्ति सुदृढीकरण गर्ने विषयमा समेत बैठकमा छलफल भएको थियो । क्षेत्रीय निर्देशक गुप्ताले नेपाललाई विश्व बैंकको लगानी आगामी दिनमा पनि जारी रहने बताएका थिए ।
भेटमा ऊर्जा मन्त्रालयका सचिव सुरेश आचार्य, सहसचिवद्वय चिरञ्जीवी चटौत, सागरराज गौतम, विश्व बैंक नेपालका देशीय निर्देशक डेभिड सिस्लेनलगायतको सहभागिता थियो ।
.jpg)
