ऊर्जा खबर
काठमाडौँ । यस वर्षको ‘ऊर्जा ज्योति सम्मान’ विद्युत् नियमन आयोगका पूर्व-अध्यक्ष दिल्लीबहादुर सिंहलाई प्रदान गरिएको छ । स्वतन्त्र ऊर्जा उत्पादकहरूको संस्था, नेपाल (इपान) को २४औँ वार्षिक साधारण सभा तथा ८औँ अधिवेशनको उद्घाटन समारोहमा सिंहलाई उक्त सम्मान प्रदान गरिएको हो । कार्यक्रममा ऊर्जा, जलस्रोत तथा सिँचाइ मन्त्री विराजभक्त श्रेष्ठले सम्मानपत्रसहित दोसल्ला ओढाएर सिंहलाई उक्त सम्मान प्रदान गरेका हुन् ।
विभिन्न सरकारी निकायमा रही झण्डै ४५ वर्ष सेवा गरेका सिंह निरन्तर ३८ वर्षसम्म सरकारी सेवा गरेका छन् । विद्युत् विकास विभागको महानिर्देशकसम्म भई ऊर्जा क्षेत्रमा सेवा गरेका सिंहले निजामती सेवाबाट निवृत्त भएपछि पनि विद्युत् नियमन आयोगको अध्यक्ष पदमा नियुक्त भई ५ वर्षे कार्यकाल पूरा गरेका थिए । यसरी उनले विभिन्न सरकारी निकायमा रही निरन्तर साढे ४ दशक ऊर्जा क्षेत्रमा पुर्याएको योगदानको कदर गर्दै उक्त सम्मान प्रदान गरिएको हो ।
इपानका पूर्व-अध्यक्ष ऊर्जा उद्यमी शैलेन्द्र गुरागाईंकी छोरी श्रीनिका गुरागाईंको स्मृतिमा स्थापना गरिएको उक्त वार्षिक सम्मानको राशि नगद १ लाख रुपैयाँ रहेको छ ।
