ऊर्जा खबर
काठमाडौँ । नेपालले बंगलादेशलाई बिजुली बेच्ने विषयमा केही दिनभित्रै सम्झौता हुने भएको छ । यसका लागि विद्युत् खरिद–बिक्रीको दर करिब टुंगो लागिसकेको र सम्झौता हुन मात्र बाँकी रहेको ऊर्जा सचिव गोपालप्रसाद सिग्देलले बताए । ‘बिजुली खरिद–बिक्रीको दरबारे मोटामोटी टुंगो लागेको छ,’ ऊर्जा खबरसँग उनले भने, ‘केही दिनमा यो विषय टुंगिन्छ र सम्झौता हुन्छ ।’
फागुन ११ देखि १४ गतेसम्म विश्व बैंकले सिंगापुरमा आयोजना गरेको सार्क ऊर्जा सचिवस्तरीय बैठकका दौरान दुई देशका सचिवस्तरीय साइडलाइन वार्तामा बिजुली खरिद–बिक्रीको दरबारे मोटामोटी टुंगो लागेको उनले बताए । भारतलाई बेचेको बिजुलीको मूल्यभन्दा कम नहुने गरी बंगलादेशलाई बेच्ने बिजुलीकाे मूल्यमा सम्झौता गर्ने टुंगाेमा पुगिएकाे उनले बताए ।
मध्यकालीन सम्झौता अनुसार नेपालले भारतलाई प्रतियुनिट औषत ८ रुपैयाँ ४० पैसामा बिजुली बिक्री गरिहेको छ । त्यसाे हुँदा भारतलाई दिएकाे मूल्यमा नघट्ने गरी प्रतियुनिट ८ रुपैयाँदेखि ९ रुपैयाँसम्ममा बिजुली खरिदबिक्री गर्ने सहमति भएको छ । ‘यो सहमतिसँगै बंगलादेशमा बिजुली निर्यात गर्ने विषयले सार्थकता पाउन लागेको छ,’ उनले भने, ‘यसले तेस्रो देशसँग विद्युत् व्यापारको ढोका खोलेको छ ।’
बिजुली बिक्रीकै विषयमा छलफल गर्न नेपाल विद्युत् प्राधिकरणका कार्यकारी निर्देशक कुलमान घिसिङ नेतृत्वको टोली ९ फागुनमा बंगलादेश गएको थियो । टोलीले बंगलादेश पावर डेभलपमेन्ट बोर्डअन्तर्गतको बोलपत्र मूल्यांकन समितिसँग १० फागुनमा वार्ता गरेको थियो । तर, वार्तामा नेपालले भारतलाई बिक्री गरेको भन्दा कम मूल्यमा बंगलादेशले ४० मेगावाट विद्युत् नेपालसँग खरिद गर्ने अडान राखेको थियो । उक्त अडानका कारण कुरा मिल्न नसकेपछि टोली फर्किएको थियो ।
हालै सिंगापुरमा भएको दुई देशका सचिवस्तरीय वार्तामा भने भारतलाई दिएको भन्दा बढी मूल्य दिन तयार भएको ऊर्जा मन्त्रालयका प्रवक्ता सहसचिव नवीनराज सिंहले समेत पुष्टि गरे ।
