बैंक तथा वित्तीय संस्था परिसंघको अध्यक्षमा पौड्याल

काठमाडौँ । बैंक तथा वित्तीय संस्था परिसंघ (सीबीफीन) को अध्यक्षमा उपेन्द्र पौड्याल नियुक्त भएका छन् । नबिल बैंक लिमिटेडको अध्यक्षसमेत रहेका पौड्याललाई परिसंघको १५औं बैठकले अध्यक्षमा चयन गरेको हो ।

निवर्तमान अध्यक्ष पवन गोल्यानको राजीनामासँगै रिक्त हुन आएको उक्त पदमा पौड्याल चयन भएका हुन् ।एनएमबी बैंकको सञ्चालकबाट अलग हुन थालेको भन्दै निवर्तमान अध्यक्ष गोल्यानले अध्यक्ष पदबाट राजीनामा दिएका थिए । संस्थाको विधानको भावना र मर्मलाई आत्मसाथ गर्दै पदीय आचरण र नैतिकताका आधारमा गोल्यानले अध्यक्ष पदबाट राजीनामा दिएको बताइएको छ ।

निवर्तमान अध्यक्ष गोल्यानकै विशेष अगुवाईमा वि.सं. २०७६ मा सीबीफिन स्थापना भएको थियो । गोल्यान यो संस्थाका संस्थापक अध्यक्ष हुन् । अध्यक्ष पौड्याल भने विगत तीन दशकदेखि बैंकिङ क्षेत्रमा क्रियाशील छन् ।

सन् १९८६ मा स्ट्यान्डर्ड चार्टर्ड बैंकबाट बैंकिङ सेवामा प्रवेश गरेका पौड्यालले एनएमबी बैंकको प्रमुख कार्यकारी अधिकृतको जिम्मेवारी सम्माहालिसकेका छन् । एनएमबी बैंकबाट बाहिरिएसँगै उनी नबिल बैंकको सञ्चालक बनेका थिए ।

बैंकिङसहित राष्ट्रिय एवं अन्तर्राष्ट्रियस्तरका विविध क्षेत्रमा उनले हासिल गरेको लामो अनुभव, बृहत्तर ज्ञान, अनुभव तथा दुरदर्शी नेतृत्व क्षमताबाट सीबीफीनले नयाँ उचाइ प्राप्त गर्ने विश्वास व्यक्त गरिएको छ ।