ऊर्जा खबर
काठमाडौँ । सानीभेरी हाइड्रो पावर कम्पनी प्रालिले ४६.७२ मेगावाटको आंशिक जलाशय जलविद्युत् आयोजना निर्माण गर्ने भएको छ । रूुकुम पूर्वकाे सिस्ने गाँउपालिका–७ र ८ हुँदै बग्ने सानीभेरी नदीमा कम्पनीले उक्त आयोजना निर्माण अघि बढाएको हो । यसका लागि अनुमति पत्रको माग गर्दै कम्पनीले आवेदन दिएको विद्युत् विकास विभागले सोमबार सूचना प्रकाशित गरेर जानकारी गराएको छ ।
सूचना अनुसार आयोजनाको प्रारम्भिक वातावरणीय परीक्षण (आईईई) प्रतिवेदन तयार भइसकेको छ । आयोजनाका मुख्य भौतिक संरचनाहरू सिस्ने गाँउपालिका र मुसिकोट नगरपालिका सिमानामा सानीभेरी नदीको बायाँ किनारमा रहने छ ।
आयोजनाबाट वार्षिक सरदर २५१.९८ गिगावाट घण्टा विद्युतिय ऊर्जा उत्पादन हुनेछ । आयोजनाबाट दैनिक ६ घन्टाका दरले पिक आवर विद्त् उत्पादन गर्न सकिन्छ । उत्पादित विद्युत्लाई विद्युत् गृहको स्वीचयार्डमा रहने २० एमभीएको ट्रान्सर्फमरबाट ६ किलोमिटर लामो १३२ केभी सिंगल सर्किट प्रसारण लाइनमार्फत प्रस्तावित बाफिकोट सबस्टेसन भेराखेतमा जोडिनेछ । आयोजनाबाट २०८६ सम्ममा विद्युत् उत्पादन गर्ने लक्ष्य छ ।
आयोजनाबाट कुनै उल्लेखनीय वातावरणीय प्रभाव पर्ने देखिए प्रथमपटक सूचना प्रकाशित भएको मितिले ३५ दिनभित्र विद्युत् विकास विभाग वा कम्पनीसमक्ष लिखित रायसूझाव पेश गर्न कम्पनीले सरोकारवाला सबैमा आह्वान गरेको छ ।
