याम्ब्लिङ खोलाको ६० प्रतिशत निर्माण पूरा, डेढ वर्षमा विद्युत उत्पादन

काठमाडौं । सिन्धुपाल्चोकको जुगल गाउँपालिकामा निर्माणाधीन ७.२७ मेगावाटको याम्ब्लिङ खोला जलविद्युत आयोजनाको ६० प्रतिशत निर्माण पूरा भएको छ । याम्ब्लिङ हाइड्रो पावर कम्पनीले निर्माण गरिरहेकाे आयोजनाको आधा भन्दा बढी काम सकिएको हो ।

२०७७ बैशाखदेखि निर्माण सुरु भएको आयोजनाको डेढ वर्षमा भाैतिक प्रगति ६० प्रतिशत भएकाे कम्पनीका अध्यक्ष सुशन कर्माचार्यले बताइन् । उनका अनुसार आयोजनाको सबै क्षेत्रको काम एकसाथ अघि बढेको छ ।

‘आयोजनाको बाँध क्षेत्रको काम पूरा भएको छ,’ उनले ऊर्जा खबरसँग भनिन्, ‘सर्जट्याङको काम भइरहेको छ, । ६ सय मिटर पेनस्टक पाइप पनि बिछ्याएर सकिएको छ ।’ आयोेजनामा २ हजार ७ सय मिटर पेनस्टक पाइप रहने गरी डिजाइन गरिएकाे छ ।

विद्युतगृहको सिभिल संरचनाको काम पूरा भएको छ । विद्युतगृहमा उपकरण जडानको तयारी भइरहेको उनले जानकारी दिइन् । आयोजनाको अब उपकरण जडानलगायतका जटिल काम बाकी रहेकोले सम्पन्न गर्न डेढ वर्ष लाग्ने पनि कर्माचार्यले बताइन् ।

आयोजनाको सबै काम पूरा गरेर २०८० बैशाखभित्र विद्युत उत्पादन सुरु गर्ने लक्ष्य रहेको कम्पनीले जनाएको छ । आयोजना पूरा भएपछि उत्पादित विद्युत ३३ केभी प्रसारण लाइनमार्फत नेपाल विद्युत प्राधिकरणको बाह्रबिसे सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनी आफैले निर्माण गर्नेछ ।

आयोजना पूरा गर्न १ अर्ब ४० करोड रुपैयाँ लागत अनुमान गरिएको छ । आयोजनामा ७० प्रतिशत ऋण लगानी र ३० प्रतिशत स्वपूँजी लगानी छ । आयोजनामा लुम्बिनी डेभलपमेन्ट बैंकको अगुवाईमा साग्रीला डेभलपमेन्ट बैंकले ७० प्रतिशत लगानी गरेको छ । कम्पनीले विद्युत विकास विभागबाट २०७३ असोज ९ गते उत्पादन अनुमति लिई आयोजना अघि बढाएको थियो ।