ऊर्जा खबर
काठमाडौं । टोखा नगरपालिकाले ‘मेयर उज्यालो कार्यक्रम’ अन्तर्गत ४३४ सडक बत्ती जडान गरेको छ । आर्थिक वर्ष (आव) २०७९/८० मा मेयर उज्यालो कार्यक्रम अन्तर्गत साे सडक बत्ती जडान गरिएको हो ।
टोखाभित्रका विभिन्न सडकमा ४३४ सडकबत्ती र १३० सिसी क्यामरा जडान गरेको नगरपालिकाले जनाएको छ । नगरपालिकाले आव २०७७/७८ देखि बजेट विनियोजन गरेर ‘मेयर उज्यालो कार्यक्रम’ अन्तर्गत सडकबत्ती र सिसी क्यामेरा जठान गर्दै आएको छ ।
आव २०८०/८१ मा पनि ‘मेयर उज्यालो कार्यक्रम’ लाई निरन्तरता दिँदै नेपाल विद्युत प्राधिकरणसँगको लागत साझेदारीमा नगर क्षेत्रभित्रका उपयुक्त सार्वजनिक स्थानहरूमा सडक बत्ती जडान गर्ने कार्यक्रम अघि सारेको छ । यसका लागि नगरपालिकाले २ करोड रुपैयाँ बजेट छुट्याएको छ ।
टोखाले चालु आवमा वडा नम्बर २ र ६ को वडा कार्यालय भवन निर्माण गर्नुका साथै नगरपालिकाको प्रशासकीय भवन निर्माण समेत सम्पन्न गरेको छ । सार्वजनिक भवन, ताल, पोखरी संरक्षण, ऐतिहासिक सम्पदाको पुनर्निर्माण, नदी नियन्त्रण, खानेपानी डिप बोरिङ एवम् पाइपलाइन विस्तारलाई प्राथमिकता दिएको टोखाले चालु आवमा १२.१५ किलोमिटर पक्की सडक निर्माण गरिसकेको छ ।
यस्तै, ब्लक विच्छ्याउने काम ३.२९ वर्ग किलोमिटर, पुल कल्भर्ट १२ वटा, ढल विच्छ्याउने तथा मर्मत कार्य ५.११ किलोमिटर, खानेपानी पाइपलाइन विच्छ्याउने तथा मर्मत १३२ स्थानमा गरिएको नगरपालिकाले जनाएको छ ।
.jpg)
