ऊर्जा खबर
काठमाडौं । सरकारले आगामी ५ वर्षमा विद्युत उत्पादन क्षमता ६५०० मेगावाट पुर्याउने घोषणा गरेको छ । प्रधानमन्त्री तथा मन्त्रिपरिषद् कार्यालयमा सोमबार (पुस २५ गते) आयोजित कार्यक्रममा ‘नीतिगत प्राथमिकता र न्यूनतम साझा कार्यक्रम’ सार्वजनिक गरी उक्त घोषणा गरेको हो ।
प्रधानमन्त्री पुष्पकमल दाहाल ‘प्रचण्ड’ को उपस्थितीमा सत्ता साझेदार दलहरूका तर्फबाट सार्वजनिक कार्यक्रममा उत्पादनसँगै प्रतिव्यक्ति विद्युत खपत ७०० किलोवाट घण्टा (युनिट) पुर्याउने लक्ष्य राखेको छ । यस्तै, कार्यक्रममा मार्फत गार्हस्थ उपभोगका निम्ति वर्षायाममा मासिक ५० युनिट र हिउँदयाममा मासिक ३० युनिट बिजुली निशुल्क उपलब्ध गराउने घोषणा गरेको छ ।
विद्युत् महसुललाई सर्वसाधारणले व्यहोर्न सक्नेगरी समायोजन गर्ने, २ वर्षभित्र शतप्रतिशत जनसङख्यामा विद्युत पहुँच पुर्याउने घोषणा गरेको हो । विद्युत् उत्पादन विस्तार मार्फत आर्थिक वृद्धिदर बढाउने, विद्युतीकरणमार्फत आमनागरिकको जीवन सहज तुल्याउने घोषणा गरेको छ ।
इन्धनमाथिको परनिर्भरता न्यून गर्ने, मुलुकको औद्योगीकरणमा टेवा पुर्याउने र नवीकरणीय ऊर्जाको प्रयोगमार्फत वातावरणमा सुधार ल्याउने लक्ष्य निर्धारण गरेको छ ।
सरकारले निर्माणाधीन जलविद्युत् आयोजनाहरू समयमै सम्पन्न गरी जलविद्युत् निर्यातमा वृद्धि गर्ने र राष्ट्रिय आय बढाउने तथा वैकल्पिक ऊर्जाको प्रयोगलाई प्रोत्साहन गर्ने लक्ष्य राखेको छ ।
