ऊर्जा खबर
काठमाडौं । बागलुङ जिल्लाको निसी खोला गाउँपालिकामा रहेको दुई लघु जलविद्युतको उत्पादन बन्द भएको छ । निरन्तर वर्षाका कारण आयोजनाकाे विद्युत गृहमा क्षति पुग्दा पाँच दिनदेखि विद्युत केन्द्रको उत्पादन बन्द भएको हो ।
निसी खोला पहिलो र दोस्रो जल विद्युतगृहको उत्पादन बन्द हुँदा करिब १० हजार ग्राहकको सेवा आपूर्ति बन्द हुन पुगेको छ । निसीखोलामा रहेका विद्युत केन्द्रमा बाढी पस्दा र पहिराले नहर बगाउँदा उत्पादन बन्द भएको गाउँपालिकाका अध्यक्ष सुर्य बहादुर घर्तीले बताए ।
‘निसीखोला पहिलो लघु जलविद्युत् आयोजनाको विद्युत गृहमा बाढी बसेर अवरुद्ध भएको छ’, उनले ऊर्जाखबरसँग भने, ‘निसी खाेला दोस्रोको नहर बगाएको छ ।’
पहिराले नहर जोखिममा पर्नेबित्तिकै बनाउन सुरु गरे पनि अझै विद्युतगृह सञ्चालनमा ल्याउन सकिएको छैन् । विद्युतगृह सञ्चालनमा आउन अझै समय लाग्ने देखिएको घर्तीले बताए ।
दुईवटा विद्युत आयोजना अवरुद्ध हुँदा दर्जनौं साना तथा घरेलु उद्योगहरू ठप्प भएका छन् । विद्युत अवरुद्ध भएपछि दँसैसमेत खल्लो भएको स्थानीयको भनाइ छ ।
दुई विद्युत् आयोजना अवरुद्ध हुँदा निसीखोला गाउँपालिका–३, ४ र ५ का करिब १० हजार बासिन्दा अन्धकारमा बस्न बाध्य भएको घर्तीले बताए ।
