काठमाडौँ । ल्हेन्दे खोला हुँदै भोटेकोसीमा मंगलबार (असार २४ गते) आएको भीषण बाढीपछि हाल १११ मेगावाटको रसुवागढी जलविद्युत् केन्द्रको विद्युत् गृहका मेसिन चुहिएको पानी (सिपेज) ले डुबाउने खतरा बढेको छ । केन्द्रको भूमिगत विद्युत्गृहमा यसअघि चुहिने गरेको पानीलाई केन्द्रले नै उत्पादन गर्ने गरेको बिजुलीको प्रयोग गरी स्थायी संयन्त्रमार्फत बाहिर फाल्ने गरिएको थियो । हाल पानी चुहिने क्रम बढेको र विद्युत् उत्पादन बन्द रहेकोले पानी बाहिर निकाल्न समस्या भएको हो ।
विद्युत्गृहभित्र पानीको सहत बढ्दै गए मेसिनहरू बिग्रिन सक्ने भएकाले तत्काल पानी बाहिर फाल्न काठमाडौँबाट हेलिकोप्टरमार्फत ३ वटा ठूला क्षमताका पानी तान्ने मेसिन (वाटर पम्प) लैजाने तयारी भइरहेको केन्द्रको प्रवर्द्धक रसुवागढी हाइड्रोपावर कम्पनी लिमिटेडका निर्देशक बाबुराजा महर्जनले ऊर्जा खबरलाई जानकारी दिए ।
‘पावर हाउसमा पानीको सतह बढ्दै गएको छ, यो क्रम जारी रहे मेसिनहरु डुबेर समस्या आउन सक्छ,’ उनले भने, ‘पानी तत्काल बाहिर फाल्न काठमाडौँबाट निजी हेलिकोप्टर प्रयोग गरी ३ वटा वाटर पम्प लैजाने तयारी गरिएको छ ।’
मंगलबार आएको बाढीले आयोजनाको बाँध क्षेत्रकाका संरचना पुरेको भए पनि बाँधका गेटहरु बन्द रहेका मुख्य सुरुङभित्र बाढी पस्न नपाएको उनले बताए ।
‘बाँध क्षेत्रमा के कति क्षति भएको छ भन्ने विषयमा पुरिएको बाँधबाट लेदो माटो, ढुंगा, मुढा र फोहर सफा गरेर अध्ययन गरेपछि मात्र यकिन हुनेछ,’ उनले भने, ‘आयोजना स्थलमा एउटा टोली पुगेर निरीक्षण गर्दा बाँधको माथिल्लो भागमा रहेका केही संरचना, क्रेन तथा केही गाडीहरु बगाएको पाइएको छ ।’
विज्ञसहितको थप टोली अध्ययनका लागि जाने तयारी भइरहेको उनले बताए । मंगलबारको बाढीले आयोजनाको अस्थायी आवासगृह समेत बगाएर तथा लेदोले पुरेर पूर्णरूपमा क्षतिग्रष्त बनाएको छ ।
केन्द्रले ६ महिनाअघि २०८१ पुस १६ गतेबाट मात्र व्यावसायिक विद्युत् उत्पादन सुरु गरेको थियो ।