ऊर्जा खबर
काठमाडौं । निजी ऊर्जा उत्पादकले निर्माण गरेको अहिलेसम्मकै सबैभन्दा ठूलो सोलु दूधकोसी जलविद्युत आयोजनाको ८६ मेगावाट विद्युत भोलि (शुक्रबार) देखि राष्ट्रिय प्रसारण प्रणालीमा जोडिने भएको छ । स्वदेशी लगानीमा सोलुखुम्बुमा निर्माण सम्पन्न भईे ‘ड्राइ टेष्ट’ र ‘वेट टेष्ट’ सफल भएपछि विद्युत प्रणालीमा जोडिन लागेको हो ।
लामो समयको बाँध, सुरुङ, पेनस्टेक, विद्युतगृहको परीक्षण पश्चात आयोजनाको विद्युत १३२ केभी सोलु कोरिडोर प्रसारण लाइनको तिन्ला सबस्टेसनमार्फत राष्ट्रिय प्रसारण प्रणालीमा जोडिन लागेको प्रवर्द्धक साहस ऊर्जा कम्पनीका अध्यक्ष हिम पाठकले बताए । उनका अनुसार परीक्षण उत्पादन सुरु गर्न नेपाल विद्युत प्राधिकरणका प्राविधिक टोली अहिले आयोजना स्थलमा खटिएका छन् ।
एक महिनाभन्दा बढी समय लगाएर गरिएको आयोजनाको विद्युत शुक्रबारदेखि प्रणालीमा जोडिनेछ’ उनले भने । आयोजनाबाट २ सातासम्म परीक्षण उत्पादन गरिनेछ । परीक्षण उत्पादनको चरण पूरा भएपछि व्यवसायीक उत्पादन सुरु गरिने पाठकले बताए ।
यो आयोजना निजी क्षेत्रले निर्माण सम्पन्न गरेको सबैभन्दा ठूलो र देशको तेस्रो ठूलो आयोजना हो ।आयोजनाबाट उत्पादन भएकाे बिजुली जाेडिने विद्युतगृहदेखि सबस्टेसनसम्मको आवश्यक १२ किलोमिटर लामो प्रसारण लाइन कम्पनी आफैले निर्माण गरेको हो ।
आयोजनाबाट वार्षिक ५२० गिागावाट घन्टा (५२ करोड युनिट) विद्युत उत्पादन हुनेछ । कम्पनीका अनुसार हिउँदमा १००.२७ गिगावाट घन्टा (१० करोड २ लाख ७० हजार युनिट) र वर्षामा ४१९.९३ गिगावाट घन्टा (४१ करोड ९९ लाख ३० हजार युनिट) विद्युत उत्पादन हुनेछ ।
आयोजनाबाट यसअघि २०७८ चैतबाट नै विद्युत उत्पादन सुरु गर्ने तालिका भएपनि कोभिड–१९ महामारीको प्रभाव, प्रसारण लाइन निर्माणमा भएको ढिलाई, उपकरण ढुवानी समस्यालगायतले तालिका सरेको कम्पनीले जनाएको छ ।
यो आयोजना सम्पन्न गर्न करिब ११ अर्ब ८६ करोड रुपैयाँ लागत अनुमान गरिएको छ । आयोजनामा नेपाल इन्भेष्टमेन्ट बैंकसहित ९ बैंकले ८ अर्ब ६५ करोड रुपैयाँ लगानी गरेका छन् । बाँकी २ अर्ब ४५ करोड रुपैयाँ संस्थापक र १ अर्ब ५ करोड रुपैयाँ साधारण सेयरबाट जुटाइएको छ ।
सोलु खोला बेसिनमा सोलु–दूधकोसी बाहेक ८२ मेगावाटको तल्लो सोलु, १९.८ मेगावाटको माथिल्लो सोलु, ५ मेगावाटको जुनबेंसीलगायतका आयोजना निर्माणाधीन छन् । २३.५ मेगावाटको सोलु निर्माण पूरा भई सञ्चालनमा आइसकेको छ ।
.jpg)