ऊर्जा खबर
जुम्ला । जुम्लाको गुठीचौर गाउँपालिका–१ का ४८० घरधुरी ३ महिनादेखि विद्युत्विहीन भएका छन् । यस वडामा रहेको अदालीखोला लघुजलविद्युत् आयोजनाको जेनरेटर र ट्रान्सफर्मरमा समस्या आएपछि आपूर्ति बन्द भएको हो ।
विद्युत् आपूर्ति बन्द हुँदा नापानी, गढीगाउँ, मणिसाँघु, डिल्लीकोट र मणिगाउँमा सेवा अवरुद्ध भएको स्थानीय परेक ऐडीले बताए । गत फागुनदेखि ५५ किलोवाटको जेनरेटर र ट्रान्समिटर बिग्रिएपछि बिजुली आपूर्ति ठप्प छ । तर, मर्मतका लागि सम्बन्धित निकायको ध्यान जान नसकेको स्थानीयवासीको गुनासो छ ।
बिजुली अभावले बालबालिकाको पठनपाठन, मोबाइल चार्ज, कुटानी–पिसानी मिल र स्थानीय फर्निचर उद्योगलगायतमा असर परेको अर्का स्थानीय गणेश ऐडी बताउँछन् । आयोजनाका अध्यक्ष जितेन्द्र लामाले आर्थिक अभावका कारण जेनरेटर र ट्रान्समिटर मर्मत गर्न नसकिएको जानकारी दिए ।
गुठीचौर गाउँपालिका–१ का वडाध्यक्ष अर्जुनकुमार महताराका अनुसार आयोजना मर्मतका लागि स्थानीय सरकारले ३ लाख रुपैयाँ विनियोजन गरेको छ । आवश्यक परे थप बजेटको व्यवस्थापन गरिने वडा अध्यक्षको भनाइ छ । अब चाँडै विद्युत सेवा सञ्चालनका लागि आवश्यक काम हुने वडा कार्यालयले जनाएको छ ।
