ऊर्जा खबर
काठमाडौं । दैलेखका स्थानीय तहका ९० वडामा राष्ट्रिय प्रसारण प्रणालीको विद्युत् पुगेको छ । नेपाल विद्युत् प्राधिकरणले विद्युतीकरण विस्तार गरी ११ स्थानीय तहका यी वडामा विद्युत् पहुँच पुर्याएको हो ।
जिल्लामा अहिलेसम्म ७० प्रतिशत विद्युतीकरण भइसकेको प्राधिकरण दैलेख वितरण केन्द्र प्रमुख नरेशदत्त रावलले बताए । उनका अनुसार जिल्लाका १५ हजार ८०० घरधुरीमा विद्युत् पहुँच पुगेको छ ।
पछिल्लो २ महिनामा मात्रै जिल्लाका ८०० घरधुरीमा विद्युतीकरण विस्तार भएको पनि रावलले जानकारी दिए । जिल्लामा विद्युतीकरणले तीव्रता पाएसँगै दैलेखमा प्राधिकरणका ग्राहकको संख्या पनि बढेको उनले बताए ।
दैलेखका ९० वडामध्ये हालसम्म ८२ वडामा विद्युतीकरणको काम सम्पन्न भएको वितरण केन्द्रले जनाएको छ । ‘विद्युतीकरणको तीव्र विस्तारसँगै विद्युतका उपभोक्ताको सङ्ख्या बढ्दै गएको छ । दुई महिनाको अवधिमा थप ८०० घरधुरीमा विद्युत् विस्तार भएको छ’, रावलले भने ।
जिल्लाका आठविस नगरपालिका, ठाँटिकाँध गाउँपालिका र चामुण्डाविन्द्रासैनी नगरपालिकाका केही वडामा मात्र विद्युतीकरणको काम हुन बाँकी छ । रावलका अनुसार मङ्गलबार मात्र ठाँटिकाँध गाउँपालिका–५ का ६०० घरधुरीमध्ये ५५० घरमा बत्ती बालिएको छ ।
स्थानीय सरकार सञ्चालनमा आएसँगै दैलेखमा विद्युतीकरणले तीव्रता पाएको हो । सामुदायिक विद्युतीकरणअन्तर्गत स्थानीय तहले विद्युत् विस्तारको कामलाई अघि बढाएका थिए । हाल सामुदायिक विद्युतीकरणअन्तर्गत केही स्थानीय तहको काम प्राधिकरणको दैलेख वितरण केन्द्र मातहत हुँदै आएको छ ।
