ऊर्जा खबर
काठमाडौँ । धनुषाको वीरेन्द्र बजारमा १६.६ एमभीएको पावर ट्रान्सफर्मर जडित ३३/११ केभीको नयाँ सबस्टेसन सञ्चालनमा आएको छ । उक्त सबस्टेसन सञ्चालनमा आएसँगै स्थानीय बासिन्दाले लामो समयदेखि झेल्दै ‘लो भोल्टेज’ जस्ता विद्युत् आपूर्तिको समस्यामा उल्लेख्य सुधार आउने अपेक्षा गरिएको नेपाल विद्युत् प्राधिकरणको धनुषाधाम वितरण केन्द्रले जनाएको छ ।
मधेश प्रदेश अन्तर्गत प्राधिकरणको योजना व्यवस्थापन निर्देशनालयको आयोजनामार्फत नयाँ सबस्टेसन निर्माण गरिएको सबस्टेसन आयोजनाका प्रमुख इन्जिनियर वीरेन्द्रकुमार झाले बताए । उनका अनुसार सबस्टेसनले हाल करिब २० किलोमिटर टाढाको धनुषाधाम सबस्टेशनबाट सञ्चालित गोदार फिडरको लोड घटाउन समेत यो नयाँ सबस्टेसनले उल्लेखनीय योगदान गर्ने छ ।
धनुषाधाम वितरण केन्द्रका प्रमुख रोशन कुमार सिंहले सबस्टेशन सञ्चालनमा आएसँगै अब वीरेन्द्र बजार र धनुषाधाम सबस्टेसनबीचका केही फिडरहरू रिङ मेन फिडर प्रणालीमा रूपान्तरण गरिने बताए । यस प्रविधिको प्रयोगले विद्युत् आपूर्तिको विश्वसनीयता अझ बलियो बनाउने उनको भनाइ छ ।
विद्युत् सेवा प्रवाहलाई अझ प्रभावकारी, स्थिर र भरपर्दो बनाउँदै लैजाने प्राधिकरणको प्रतिबद्धता अनुसार सबस्टेसन विस्तारका आयोजनाहरू सञ्चालन भइरहेको उनले बताए ।
