रसुवागढीको काम अन्तिम चरणमा, ६ महिनाभित्र विद्युत उत्पादन सुरु

काठमाडौं । रसुवामा निर्माणाधीन १११ मेगावाटको रसुवागढी जलविद्युत आयोजनाले २०७९ चैतभित्र विद्युत उत्पादन सुरु गर्ने भएको छ । रसुवागढी हाइड्रो पावर कम्पनीले निर्माण गरिरहेको आयोजनाले आगामी ६ महिनाभित्र उत्पादन सुरु गर्ने भएको हो ।

आयोजनाको बाँकी सबै काम पूरा गरेर आगामी चैतसम्म विद्युत उत्पादन सुरु गर्ने लक्ष्य रहेको आयोजना प्रमुख सत्यराम ज्याख्वाले बताए । उनका अनुसार तिव्र गतिमा अघि बढेको आयोजनाको करिब ९० प्रतिशत काम पूरा भएको छ । अहिले हाइड्रो तथा इलेक्ट्रो मेकानिकल उपकरण जडानको काम भइरहेको छ ।

‘आयोजनाको लट–१ सिभिल तथा इलेक्ट्रोमेकानिल तर्फको काम ९० प्रतिशत पूरा भएको छ’ उनले भने । इलेक्ट्रोमेकानिकलको ठेक्का पाएको भारतीय कम्पनी भोइथ हाइड्रोले विद्युतगृहमा इलेकट्रोमेकानिकल उपकरण जडान गरिरहेको छ । कोरोनाकालमा इलेक्ट्रोमेकानिकलतर्फको काम रोकिँदा आयोजनाको विद्युत उत्पादनको तालिका प्रभावित हुन पुगेको थियो ।

यस्तै, हाइड्रोमेकानिकलतर्फको उपकरण जडान कार्य पनि भइरहेको छ ।  आयोजनाबाट यसअघि नै विद्युत उत्पादन सुरु गर्ने तालिका भएपनि  २०७२ सालको विनासकारी भुकम्प,  नाकाबन्दी, वर्षायाममा आयोजना क्षेत्रमा आएको बाढी, पहुँचमार्गमा निरन्तर गएको पहिरो, विश्वव्यापी रुपमा फैलिएको कोरोना महामारीले गर्दा उत्पादन तालिका लम्बिदै गएको कम्पनीले जनाएको छ ।

कम्पनीको पछिल्लो तालिका अनुसार आयोजनाबाट २०७८ असारभित्र सम्पन्न गर्ने लक्ष्य थियो तर, २०७७ सालको वर्षायाममा प्रक्षेपण गरिए भन्दा अघि आएको बाढीले बाँधस्थलको अस्थायी संरचनामा क्षति पुग्न गई निर्माण स्थगित गरिएको र अडिड सुरुङ जाने बेलीब्रिजमा क्षति पुर्याई आवत/जावतमा कठिनाई र पहुँचमार्ग पूर्ण रुपमा क्षति पुगेकोले सम्पन्न गर्न नसकिएको कम्पनीले जनाएको छ ।

कम्पनीको नयाँ तालिका अनुसार आयोजनाबाट २०७९ चैतभित्र उत्पादन सुरु गर्ने लक्ष्य छ । यो अवधिभित्र निर्माण सम्पन्न गर्न ब्याज बाहेक १७ अर्ब १ करोड रुपैयाँ लागत अनुमान गरिएको कम्पनीले जनाएको छ ।

यस्तै आयोजनाको विद्युत जोडिने प्रसारण लाइनको ठेक्का पाएको मुडभरी एण्ड जोशी प्रालिले विविध कारण पटकपटक म्याद थप गर्दा पनि तोकिएको समयमा कार्य सम्पन्न हुने कुनै ठोस आधार नदेखिएको हुँदा ठेक्का अन्त्य गरी नयाँ ठेक्का गरिएको छ ।

प्रसारण लाइन निर्माण गर्ने ठेक्का रोयल कन्स्ट्रक्सन कम्पनीले पाएको छ । सम्झौता अनुसार ठेकेदारले लाइन निर्माणको काम ६ महिनाभित्र पूरा गर्नेपर्नेछ ।