ऊर्जा खबर
काठमाडौं । नेपाल विद्युत प्राधिकरणले विभिन्न रिक्त पदपूर्ति गर्न ७ सय ६५ कर्मचारीको बढुवा गर्ने भएको छ । प्राधिकरणले ज्येष्ठता र कार्यसम्पादन मुल्याङकन र कार्यक्षमता मुल्याङकनद्वारा बढुवा गर्न लागेको हो ।
निर्देशकदेखि हेल्परसम्म रिक्त पदमा बढुवा गरी पूर्ति गर्न दरखास्ता आह्वान गरिएको प्राधिकरणले जनाएको छ । प्राधिकरणका अनुसार ज्येष्ठता र कार्य सम्पादन मुल्याङकनको आधारमा २ सय ८८ र कार्य क्षमताका आधारमा ४ सय ७७ जनाको बढुवा गर्न आवेदन माग गरिएको हो ।
ज्येष्ठता र कार्यसम्पादन मुल्याङकनका आधारमा ११ तहमा ८ जना र १०, ९ र ७ तहमा ९/९ जनाको बढुवाको लागि आवेदन माग गरिएको छ । यस्तै, ८ तहमा १२, ६ तहमा २८, ५ तहमा ३७, ४ तहमा २१, ३ तहमा ३३ र २ तहमा १२२ कर्मचारीको रिक्त पद बढुवा गरी पूर्ति गरिने भएको छ ।
यस्तै, कार्यक्षमता मुल्याङकनका आधारमा ११ तहमा ७, १० तहमा १५, ९ तहमा १४, ८ तहमा २७, ६ तहमा २६, ५ तहमा ४९ जनालाई बढुवा गर्नेछ । यस्तै, ४ तहमा २६, ३ तहमा ३१ र २ तहमा २ सय ८२ जनाको बढुवाका लागि आवेदन माग गरेको छ ।
बढुवा हुने पदमा तोकिएको सेवा अवधि र न्युनतम शैक्षिक योग्यता पुगेका उम्मेदवारले यो सूचना प्रकाशित भएको ३० दिनभित्र प्राधिकरण, पदपूर्ति विभाग, बढुवा सिफारिस महाशाखामा प्राप्त हुने गरी आवेदन दिनुपर्नेछ ।
