ऊर्जा खबर
काठमाडौँ । सत्तारुढ दल नेकपा एमालेकी नेतृ एवं प्रतिनिधि सभा सदस्य (सांसद) सुनिता बरालले औद्योगिक क्षेत्रमा भइरहेको अघोषित लोडसेडिङ अन्त्य गर्न सरकारसँग माग गरेकी छन् । बुधबार प्रतिनिधि सभाको शून्य समयमा बोल्दै उनले यस्तो बताएकी हुन् । २४ घन्टा लगातार चल्नुपर्ने उद्योगहरू विद्युत् आपूर्ति नहुँदा कम क्षमतामा चलेर घाटा ब्यहोर्न बाध्य भएको उनको भनाइ छ ।
‘लोडसेडिङ मुक्त देश भनेर गौरव गर्दै गर्दा यो खुसी केबल काठमाडौँका लागि मात्र हो भनेर बुझ्नु पर्ने बाध्यता हामीमा छ,’ उनले भनिन्, ‘औद्योगिक करिडोरका उद्योगहरू कतिबेला विद्युत् जाने हो र कति घाटा बेहोर्नु पर्ने हो भन्ने चिन्तामा छन् ।’
अर्थतन्त्रमा महत्वपूर्ण भूमिका खेल्ने उद्योग क्षेत्र पूर्ण क्षमतामा चलाउने वातावरण बनाउन उनले माग गरिन् ।
‘औद्योगिक क्षेत्रमा भएको यो अघोषित दैनिक १२ देखि १५ घन्टाको औद्योगिक लोडसेडिङ अन्त्य गर्दै अर्थतन्त्रलाई निर्णायक महत्त्व राख्ने उद्योग संचालनको लागि सहजीकरण गर्न सरकारको ध्यानाकर्षण गराउन चाहान्छु,’ उनले भनिन् ।
.jpg)