ऊर्जा खबर
काठमाडौं । सिटिजन्स बैंक इन्टरनेसनलले १० मेगावाटको सिद्धि खोला जलविद्युत् आयोजनामा १ अर्ब २९ करोड रुपैयाँ ऋण लगानी गर्ने भएको छ । बैंकले सिद्धि हाइड्रो पावर कम्पनीले अघि बढाएको एकल ऋण लगानी गर्ने भएको हो ।
आयोजनामा १ अर्ब २९ करोड ७५ लाख रुपैयाँ ऋण लगानी गर्न सम्झौता भइसकेको छ ।सम्झौतापत्रमा बैंकका तर्फबाट प्रमुख कन्सोटियम/इन्फ्रास्ट्रक्चर बैंकिङ युनिटका रोशन मल्ल र कम्पनीका प्रबन्ध सञ्चालक सन्तोषराज नेपालले हस्ताक्षर गरे ।
आयोजनामा बैंककाे लगानी कूल लगानीको ७५ प्रतिशत हो । यस परियोजना सम्पन्न गर्न १ अर्ब ७३ करोड (निर्माण अवधिको बाहेक) रुपैयाँ लागत अनुमान गरिएको छ । आयोजनामा ७५ प्रतिशत ऋण लगानी र २५ प्रतिशत स्वपुँजी लगानी रहनेछ । निर्माण अवधिको ब्याज सहित बाँकी लागत प्रवर्द्धक कम्पनीबाट जुटाइने छ ।
आयोजनाको काम साढे ३ वर्षभित्र सम्पन्न गरी विद्युत् उत्पादन थाल्ने कम्पनीको लक्ष्य छ । आयोजना पूरा भएपछि हिउँदमा ८.८० गिगावाट घण्टा र वर्षामा ४६.९११ गिगावाट घण्टा गरि वार्षिक ५५.७१ गिगावाट घण्टा विद्युत उत्पादन गर्ने छ ।
उत्पादित बिजुली १६ किलाेमिटर दुरीमा रहेकाे नेपाल विद्युत प्राधिकरण फिक्कल सबस्टेसनमा जाेडिनेछ ।
