ऊर्जा खबर
काठमाडौं । जनार्दन बरालको नेतृत्वमा नेपाल आर्थिक पत्रकार समाज (सेजन) को १० सदस्यीय नयाँ कार्यसमिति चयन भएको छ । सेजनको शुक्रबार सम्पन्न २२औं महाधिवेशनले नयाँ कार्यसमिति चयन गरेको हो ।
नयाँ पत्रिका दैनिकमा कार्यरत बराल सेजनको अध्यक्षमा निर्वाचित भएका हुन् । उनी आशिष ज्ञवाली र शिरोमणि ढुंगानालाई पराजित गर्दै २ वर्षका लागि सेजन अध्यक्षमा निर्वाचित भएका हुन् । बरारले कूल खसेको मत मध्ये ११४ मत प्राप्त गरेका छन् । उनका प्रत्यासी ज्ञवालीले ८० र ढुंगानाले ४८ मत प्राप्त गरेका थिए ।
यस्तै, उपाध्यक्षमा सुजन ओली निर्वाचित भएका छन् । उनी प्रतिस्पर्धी कृष्ण रिजाललाई पराजित गर्दै सेजन उपाध्यक्ष बनेका हुन् । यसअघिको कार्यकालमा पनि ओली महासचिव थिए । उनले १२८ मत प्राप्त गरेका छन् । उनीसँग पराजित भएका रिजालको पक्षमा १०५ मत खसेको थियो ।
यसैगरी कार्यसमितिको महासचिवमा भागवत भट्टराई विजयी भएका छन् । उनले १४० मत प्राप्त गर्दा पराजित भएका विनय बन्जाराको पक्षमा १ सय मत खसेको थियो ।
सचिवमा हिमाल पौडेल विजयी भएका छन् । उनी हिमा बिक र एलिजा उप्रेतीलाई पराजित गर्दै कार्यसमिति सचिवमा निर्वाचित भएका हुन् । पौडेल १११ मत पाएर विजयी हुँदा बिकको नाममा ६७ र उप्रेतीको नाममा ६२ मत खसेको थियो ।
कोषध्यक्षमा लक्ष्मीकुमारी सापकोटा निर्वाचित भएकी छन् । उनले प्रतिस्पर्धी सुजन ढुंगाना र कमला अर्याललाई पराजित गर्दै विजय हासिल गरेकी हुन् । कारोबार दैनिकमा कार्यरत सापकोटाको पक्षमा १२३ मत खसेको थियो । ढुंगाना र अर्यालले क्रमशः ९२ र २६ मत पाएका थिए ।
सदस्यहरूमा शोभित थपलिया, इशारा कोइराला, अच्युत पुरी, अमर बडुवाल र चेतबहादुर अधिकारी निर्वाचित भएका छन् । निर्वाचित कार्यसमिति २ वर्षका लागि हुनेछ ।
