दोर्दी कोरिडोर लाइनको ४ टावरको काम अन्तिम चरणमा, भदौभित्र पूरा हुने

काठमाडौं । २०७८ असार १ गतदेखिको वर्षासँगै पहिरोले नदीमा विलिन बनाएको १३२ केभी दोर्दी कोरिडोर प्रसारण लाइनको टावर पुनःनिर्माणको काम अन्तिम चरणमा पुगेको छ । नेपाल विद्युत प्राधिकरणले निर्माण सम्पन्न गरी सञ्चालनको तयारी गरिरहेको बेला बाढीपहिरोले बगाएको टावर निर्माणको काम सकिन लागेको हो ।

२०७८ असार लाग्नासाथ सुरु भएको अविरल वर्षासँगै दोर्दी खोलामा आएको बाढीले बगाएको ४ मध्ये २ टावरको काम सकिएको आयोजना प्रमुख रमेश प्रसाद पौडेलले बताए । बाढीले लाइनको टावर नम्बर एपि ८ए१, एपि ११, एपि ११/१ र एपि १३/२ बगाएको थियो ।

‘लाइनको दुई टावर ठड्याएर लाइन तान्ने काम पूरा भएको छ,’ उनले ऊर्जाखबरसँग भने, ‘बाँकी दुईवटा पनि भदौ पहिलो साताभित्र पूरा गर्ने लक्ष्य छ, तर पानी निरन्तर परेकोले आवश्यक उपकरण टावर गाड्ने ठाउँमा ढुवानी गर्न समस्या भएकाले केही ढिला हुनसक्छ ।’ बर्षाले असर गरेपनि लाइनको काम भदौभित्र पूरा हुन्छ’ उनले भने ।

बाढीले लाइनको टावर र जग्गा बगाउँदा ३ करोड रुपैयाँ थप लागत लाग्ने पनि पौडेलले बताए । यसअघि लाइनको अनुमानित लागत ३२ करोड रुपैयाँ थियो ।

प्राधिकरणले लमजुङको दोर्दी कोरिडोरमा निर्माणाधीन निजी क्षेत्रको जलविद्युत आयोजनाको विद्युत प्रवाह गर्न यो लाइन निर्माण गरिरहेको हो । यो लाइनमा प्रवाह हुने गरी २५ मेगावाटको माथिल्लो दोर्दी ‘ए’, १२ मेगावाटको दोर्दी–१, २७ मेगावाटको दोर्दी खोला, ५४ मेगावाटको सुपर दोर्दी ‘ख’ लगायतका आयोजना निर्माणाधीन छन् ।

माथिल्लो दोर्दी ‘ए’, दोर्दी–१, दोर्दीकाे काम अन्तिम चरणमा पुगेकाे छ । दोर्दी–१ को काम पूरा भएपछि आफ्नै लाइन पूरा गरी विद्युत प्रणालीमा जोड्न सक्ने पनि पौडेले बताए ।