विद्युतीय सवारी साधन र उपकरण प्रयोगलाई प्रवर्द्धन गर्ने सरकारको लक्ष्य

काठमाडौं । नेपालमा उत्पादित विद्युतको आन्तरिक खपत बढाउने र विद्युतीय सवारी तथा सामग्रीका बारेमा जानकारी गराउने उद्देश्यका साथ आज (भदौ १५ गते) देखि नेपाल पावर, लाइट एण्ड इलेक्ट्रिक, नेपाल कन्जुमर इलेक्ट्रोनिक्स एण्ड होम अपलायनसेस तथा नेपाल इभी अन्तर्राष्ट्रिय प्रदर्शनी-२०८० सुरु भएको छ ।

ऊर्जा जलस्रोत तथा सिँचाइमन्त्री शक्तिबहादुर बस्नेतले प्रर्दशनीको उदघाटन गरे । प्रर्दशनीको उद्घाटन गर्दै मन्त्री बस्नेतले नेपालमा उत्पादित विद्युतको आन्तरिक खपत बढाउन विद्युतीय सवारी साधन र उपकरणको प्रयोग बढाउनु पर्ने बताए । उनले विस्तारै ऊर्जामा आत्मनिर्भर हुँदै गएकाले विद्युतीय सवारी र उपकरणको प्रयोग बढाउने उद्देश्यका साथ सरकारले आफ्ना नीति तथा कार्यक्रम अगाडि बढाएको बताए ।

विद्युतीय सवारीसाधनको प्रवर्द्धनका लागि देशभर नै चार्जिङ स्टेशनको निर्माणलाई अभियानका रुपमा अगाडि बढाउने लक्ष्यका साथ काम भइरहेको उनको भनाई छ । जलवायु परिवर्तनले पारेको प्रभाव नियन्त्रणका लागि पनि स्वच्छ ऊर्जाको पहुँच विस्तार गर्नुपर्ने बताउँदै बस्नेतले सरकारले आफ्नो लक्ष्य तय गरेको बताए ।

मिडिया स्पेस सोलुसनस, फ्युचरेक्स ट्रेड फेर एण्ड इवेंट्स, एक्जीबीसन एण्ड ट्रेड सर्भिसेस इन्डिया प्रा.लि तथा इलेक्ट्रिक भेहिकल म्यानुफ्याकचर एण्ड इम्पोटर्स एस्सोसिएसन अफ नेपालको सयुक्त आयोजनामा आजदेखि सुरु भएको प्रर्दशनी १७ गतेसम्म चल्ने छ ।

आफ्नै मुलुकमा बढ्दो उत्पादित जलविद्युतको विभिन्न विद्युतीय माध्यमहरूबाट उपभोग बढाई देशलाई आर्थिक रुपमा सवलिकरण गर्न एवम ऊर्जा तथा विद्युतीय व्यवसायीहरूको समग्र विकास तथा व्यापार प्रवर्द्धनमा अत्याधिक टेवा पुर्याउने उद्देश्यले एक्स्पो गरिएको आयोजकले जानकारी दिए ।

उक्त प्रर्दशनीमा स्वदेशी तथा विदेशी गरी १०० भन्दा बढि कम्पनीहरूको स्टल  छन् । विद्युतीय सवारीलाई प्रवद्र्धन तथा प्रोत्साहन गर्ने, विद्युत् तथा गुणस्तरीय विद्युतीय सामाग्रीहरूको व्यवसाय विकास एवं यस क्षेत्रसँग आवद्ध आन्तरिक र अन्तर्राष्ट्रिय व्यापारको सहजीकरण एवं प्रवद्र्धनका लागि प्रदर्शनी आयोजना गरिएको जनाइएको छ ।

यस प्रदर्शनीमा विद्युतीय कार, विद्युतीय स्कुटर, मोटरसाइकल, विद्युतीय साइकल तथा रिक्सा, चार्जिङ्ग स्टेसन, ब्याट्री, ट्रान्समिसन तथा डिष्ट्रिव्यूसन सामाग्री, ऊर्जा आपूर्ति तथा नियन्त्रण यन्त्र, हाउस वायरिङ्ग सामाग्री, वायर, केबुल एवं कण्डक्टर, अत्याधुनीक प्रकारका स्वीचहरु, एलिडी लाइटिङ्ग, इलेक्ट्रोनिक्स उपकरण, घरेलु विद्युतीय उपकरणहरू, कार्यालय प्रविधि तथा अन्य विद्युतीय सामग्रीका कम्पनीहरूको सहभागिता छ ।

राष्ट्रिय एवं अन्तर्राष्ट्रिय इलेक्ट्रीक, इलेक्ट्रोनिक्स, सञ्चार एवं सूचना प्रविधि तथा विद्युतीय एवं वैकल्पिक ऊर्जा उद्यमीहरूलाई एकै स्थानमा जमघट गराई व्यवसायिक प्रवर्द्धन गर्नुको साथै यी उद्योगमा भएका नविनतम उपलब्धीहरू बारे सूचना आदान प्रदान गर्ने तथा उपभोक्ता वर्गमा उर्जाको व्यवस्थित खपतको महत्वबारे जानकारी अद्यावधिक गराउन सहयोग पुयाउने लक्ष्य रहेको छ ।

यस प्रर्दशनीमा सहयोगी संस्थाको भूमिकामा बैकल्पिक ऊर्जा प्रवर्द्धन केन्द्र, नेपाल विद्युत प्राधिकरण तथा युएसएआइडी/क्लिन एअर /एफएचआई रहेका छन । साथै ल्यान्यार्ड पार्टनरमा यासुडा तथा ई–कमर्स  पार्टनरमा दराज रहेको छ ।