ऊर्जा खबर
काठमाडौं । भक्तपुर प्रहरीले आफ्ना सहकर्मी साथीमाथि हातपात गर्ने रघु केसीविरुद्ध कारबाही प्रक्रिया सुरु नै नगरी छोडिदिएको नेपाल विद्युत प्राधिकरणका कर्मचारीले आरोप लगाएका छन् । प्राधिकरण ठिमी वितरण केन्द्रका कर्मचारीले महानगरीय प्रहरी विट ठिमीले भक्तपुर सिरुटारका ग्राहक केसीलाई पक्राउ परेको भोलिपल्ट (माघ १५ गते) छोडिदिएको आरोप लगाएका हुन् ।
प्रहरीले किटानी जाहेरीका आधारमा केसीलाई पक्राउ गरेको भए पनि प्राधिकरणसँग समन्वय नै नगरी छोडिदिएको वितरण केन्द्रका मिटर रिडिङ सुपरभाइजर प्रमोद खड्काले बताए । उनले आफुहरूलाई कानुनले पनि न्याय दिन नसकेको गुनासो गरे ।
‘उनी विरुद्धको कारबाही प्रक्रिया के हुँदैछ भनेर बिहान प्रहरी कार्यालयमा बुझ्न जाँदा केसी छुटिसकेका रहेछन्,’ उनले ऊर्जा खबरसँग भने, ‘प्राधिकरणले किटानी जाहेरी नदिएकाले छोडिएको भन्ने प्रहरीको जवाफ आयो । तर, हामीले आधिकारिकरूपमै किटानी जाहेरी दिएका थियौं । प्रहरीले हाम्रो जाहेरी रद्दीको टोकरीमा फालेर केसीलाई उन्मुक्ति दियो ।’
प्रहरीले केसीलाई भोलिका दिनमा यस्ता घटना नदोहोर्याउने प्रतिवद्धता गराएर छोड्न प्राधिकरणसँग समन्वय गर्नुपर्नेमा यतिकै छाडेको उनको गुनासो छ । उनले केसी जस्ता व्यक्तिले सहजै उन्मुक्ति पाउने हो भने ग्राहकको घरसम्म महसुल उठाउन पुग्ने प्राधिकरण कर्मचारीमाथि आक्रमणको श्रृङ्खला नरोकिनेसमेत बताए ।
केसीको ३१ महिनाको विद्युत महसुल उठाउन सिरुटार पुगेका कर्मचारीमाथि गत माघ १३ गते हातपात भएको थियो । विद्युत लाइन काटेर महसुल उठाउन वितरण केन्द्रबाट गएका कृष्णबहादुर सुवाल, गोबिन्द श्रेष्ठ, र बाबा ढकालमाथि भौतिक आक्रमण गरेका थिए । वितरण केन्द्र र कर्मचारीको किटानी जाहेरीपछि प्रहरीले माघ १४ गते केसीलाई पक्राउ गरी १ दिन थुनामा राखेर भोलिपल्ट छोडेको थियो ।
याे पनि पढ्नुहाेस् महसुल नतिर्ने ग्राहकको लाइन काट्न जाँदा भक्तपुर सिरुटारमा कर्मचारीमाथि हातपात
घटनापछि उनले प्राधिकरण कार्यालयमा आएर बाँकी २२ हजार रुपैयाँ विद्युत महसुल तिरेका थिए । उनले विद्युत महसुल बुझाए पनि प्राधिकरणले घरमा लाइन जोडेको छैन । प्राधिकरण चुहावट नियन्त्रण नियमावली अनुसार निरन्तर ६० दिनसम्म महसुल नतिरे त्यस्तो ग्राहकलाई कालोसूचीमा राखेर लाइन काट्नुपर्ने व्यवस्था छ ।
याे पनि पढ्नुहाेस् प्राधिकरण कर्मचारीमाथि हातपात गर्ने रघु केसी पक्राउ
