ऊर्जा खबर
पाल्पा (फोक्सिङकोट) । रम्भा गाउँपालिका–२ फोक्सिङकोट बेलौजा गाउँका स्थानीयबासीलाई खानेपानीको दिगो स्रोत नहुँदा पिरल्थ्यो । खडेरीयाम सुरु भएपछि पानीको जोहो कसरी गर्ने चिन्ताले सताउँथ्यो ।
खानेपानी समस्यालाई दृष्टिगत गर्दै धारादी खानेपानी तथा सरसफाइ आयोजनामार्फत लिफ्टिङ गरेर घरघरमा पानी वितरण गरिएपछि समस्या सधैका लागि टरेको छ ।
पानीको मुहान तल र बस्ती माथि रहेको गाउँमा लिफ्टिङ गरेर खानेपानीको व्यवस्था गरिएको उपभोक्ता समितिका अध्यक्ष मनबहादुर सारुले बताए । उनका अनुसार हाललाई ४३ घरधुरीमा खानेपानी वितरण गरिएको छ । खानेपानीका निम्ति कष्ट भोग्दै आएका यहाँका स्थानीयबासी घरघरमा पानी आउँदा दङ्ग छन् । पानीका लागि अन्यत्र खोजीमा भौतारिपनुपर्ने अवस्था सदाका निम्ति हटेको स्थानीयबासी एकबहादुर रानाले बताए ।
खानेपानी तथा सरसफाइ डिभिजन कार्यालय पाल्पा, बुटवल पावर कम्पनी गल्याङ, रम्भा गाउँपालिका, वडा कार्यालय र स्थानीयबासीको सहयोगसहित करिब ४७ लाख १५ हजार रुपैयाँमा आयोजना सम्पन्न गरी घरघरमा पानी वितरण गरिएको छ ।
पानी फाल्न धारादीमा २० हजार लिटर क्षमताको ट्याङ्की बनाइएको छ । दैनिक चार घण्टा मेशिन सञ्चालन गरी पानी वितरण कार्य भइरहेको अपरेटर चेतबहादुर घर्तीले बताए ।
