ऊर्जा खबर
काठमाडौं । चितवनको भरतपुर महानगरपालिकालाई उज्यालो सहर बनाउने महानगरको अभियानअन्तर्गत दोस्रो चरणको सडक बत्ती जडान कार्यक्रम सुरु गरिएको छ । महानगरपालिका र नेपाल विद्युत् प्राधिकरणको राष्ट्रिय सडक बत्ती प्रवर्द्धन आयोजनाको सहकार्यमा महानगर अन्तर्गत ११८ किलोमिटर क्षेत्रमा बत्ती जडानको प्रक्रिया सुरु गरिएको हो ।
पहिलो चरणमा ७८.१ किलोमिटर क्षेत्रमा स्मार्ट सडक बत्ती राखिएकामा दोस्रो चरणमा थप ११८ किलोमिटर क्षेत्रमा बत्ती राख्न बोलपत्र आह्वान गरिएको प्राधिकरणले जनाएको छ । पहिलो चरणको काम अन्तिममा पुगेकाेले दोस्रो चरणको कामको थालिएको छ ।
२०८० बैशाखभित्र पहिलो चरणको सडक बत्ती जडानको काम पूरा गरी दोस्रो चरणको काम सुरु गर्ने तयारी भइरहेको छ । यो चरणको काम निर्माण व्यवसायीसँग सम्झौता भएको एक वर्षभित्र सम्पन्न गर्नुपर्नेछ । दोस्रो चरणमा विभिन्न ठाउँमा आठ वटा हाइमास्ट र ६० वटा मिनिमास्ट सहितको बत्ती रहने प्राधिकरणले जनाएको छ ।
पहिलो चरणमा महानगरका सहरी क्षेत्रमा बत्ती जडान गरिएको छ भने दोस्रो चरणअन्तर्गत महानगरका ग्रामीण क्षेत्रका फराकिलो सडकलाई प्राथमिकता दिएर बत्ती जडान गरिने छ ।
आउँदो ५ वर्षभित्र दक्षिण एशियाली मापदण्ड अनुकूलको भौतिक पूर्वाधारले सम्पन्न नमुना सहर बनाउने उद्देश्यअनुरुप महानगरलाई उज्यालो सहर बनाउन लागिएको महानगर प्रमुख रेणु दाहालले बताइन । यस क्रममा स्मार्ट सडक बत्ती, विभिन्न स्थानमा हाई–मास्ट तथा मिनी–मास्ट बत्ती जडान गरिँदै छ ।
सन् २०२४ लाई भरतपुर महानगरले भ्रमण वर्षको रूपमा मनाउन लागेको भन्दै उनले मुख्य सडकमा यात्रा गर्दा आम सर्वसाधारण, पैदलयात्री, पर्यटक, महिला, विद्यार्थी तथा सवारी साधनको आवतजावतलाई सहज र सुरक्षित बनाइ सडक दुर्घटना न्यूनीकरण गर्न र आन्तरिक तथा बाह्य पर्यटकलाई रात्रिकालीन सुरक्षाको अनुभूति दिलाउन ’उज्यालो सहर–भरतपुर’ अभियान तीव्र पारिएको बताइन ।
