ऊर्जा खबर
काठमाडौं । नेपाल विद्युत प्राधिकरण पाँचखाल वितरण केन्द्रले मन्डनदेउपुर नगरपालिकाको हिगुवापाटीमा विद्युत महसुल काउन्टर सञ्चालन गरेको छ । केन्द्रले नगरपालिकाको विद्युत महसुल संकलन गर्न काउन्टर सञ्चालन गरेको हो ।
नगरपालिकाको स्थानीयलालाई विद्युत महसुल तिर्न समस्या परेकाले ग्राहकको सहजताका लागि काउन्टर सञ्चालनमा ल्याएको केन्द्र प्रमुख मेघनाथ ढकालले बताए । उनका अनुसार नयाँ काउन्टर सञ्चालनपछि नगरपालिकाका साढे ६ हजार ग्राहक लाभान्वित भएका छन् ।
अब मन्डनदेउपुरका ग्राहकले पाँचखाल काउन्टरसम्म धाउनु पर्ने बाध्यता हटेको पनि उनले बताए । काउन्टर सञ्चालनपछि स्थानीय हर्सित भएका छन् । काउन्टर सञ्चालनसँगै केन्द्रले विद्युत सेवा विस्तार, चुहावट नियन्त्रण, बक्यौता असुली, काठको पोल फेर्ने लगायतमा तिव्र गतिमा अघि बढेको छ ।
केन्द्र अन्तर्गत रहेको जिर्ण र ढल्ने अवस्थामा रहेको ९५ प्रतिशत काठको पोलको स्थानमा स्टिल वा सिमेन्टका पोलले प्रतिस्थापन गरिएको छ । पूर्ण विद्युतीकरण, अति विपन्न परिवार तथा साँस्कृतिक सम्पदामा मिटर जडान लगायत कार्यका लागि नगरपालिकाले केन्द्रसँग सहकार्य गर्दै आएको छ ।
केन्द्र अन्तर्गत अहिले करिब २० हजार ग्राहक छन् । केन्द्र अन्तर्गत हुकिङ वा चोरी गरेर विद्युत सेवा लिने सबैलाई कारबाही गरेर मिटर जडान गरिएपछि २ वर्षको अवधिमा ५ हजार ग्राहक बढेको हो ।
