ऊर्जा खबर
काठमाडौं । सिन्धुपाल्चोकस्थित ३ मेगावाटको भैरवकुण्ड जलविद्युत केन्द्र करिब साढे ७ महिनापछि सञ्चालनमा आएको छ । बर्खाको बाढीले संरचनामा क्षति पुर्याउँदा बन्द भएको जलविद्युत केन्द्र पुनर्निर्माणपछि शनिबारबाट सञ्चालनमा आएको हो ।
२०७७ जेठ २ गतेको बाढीले जलविद्युत केन्द्रको बाँध क्षेत्रका संरचनामा क्षति पुर्याएको थियो । त्यस यता जलविद्युत केन्द्रकाे उत्पादन बन्द थियाे ।
७ महिना लगाएर बाढीले बगाएका संरचनाको पुनर्निर्माण गरिएकाे जलविद्युत केन्द्र व्यवस्थापक पुष्पराज डाँगीले बताए । उनका अनुसार जलविद्युत केन्द्रकाे उत्पादन सुचारु गरी लामोसाँघु सबस्टेसनमा लगेर जोडिएको छ ।
लामो समय जलविद्युत केन्द्रको उत्पादन बन्द हुँदा विद्युत बिक्रीबाट हुने करिब ८ करोड रुपैयाँ आम्दानी गुमेको छ । ‘झण्डै साढे ७ महिना जति विद्युत उत्पादन बन्द हुँदा ठूलो आम्दानी गुम्यो,’ उनले ऊर्जा खबरसँग भने, ‘पुनर्निर्माण गर्दा पनि ३० लाख रुपैयाँ खर्च भएको छ ।’
जलविद्युत केन्द्र रहेको भोटेकोसी गाउँपालिकाका अध्यक्ष राजकुमार पौड्याल, प्रवर्द्धक भैरवकुण्ड हाइड्रो पावर कम्पनीका प्रमुख कार्यकारी अधिकृत दिनेश पौड्यालको उपस्थितीमा औपचारिकरूपमा उत्पादन सुचारु गरिएको उनले बताए ।
भैरवकुण्ड पटक–पटक प्राकृतिक प्रकाेपकाे मारमा पर्दै आएको छ । यसअघि पनि जुरेको पहिरो, भूकम्प, बाँधमा खसेकाे पहिरो र भोटेकोसी नदीमा आएको भीषण बाढीकाे प्रकाेपमा परेकाे थियाे ।
कम्पनीले पटक–पटक प्राकृतिक प्रकोपको पारमा परेको जलविद्युत केन्द्रकाे पुनर्निर्माण गरेर सञ्चालन गर्नु पर्दा आर्थिक संकटको सामनासमेत गर्नु परेकाे थियाे । नियमित आम्दानी गुमेकै कारण बैंककाे ऋण चुक्त्ता गर्न समस्या भएकाे थियाे ।
