ऊर्जा खबर
काठमाडौं । नबिल बैंक र मुक्तिनाथ विकास बैंकबिच सम्झौता भएको छ । ग्राहकलाई आवश्यकता पर्ने गैर कोषमा आधारित बैंकिङ सुबिधा उपलब्ध गराउन व्यापारिक सम्झौता भएको हो ।
सम्झौता अनुसार मुक्तिनाथका ग्राहकले नबिलमार्फत लेटर अफ क्रेडिट (एलसी), डकुमेन्ट अगेन्स्ट पेमेन्ट (डीएपी), डकुमेन्ट अगेन्स्ट एसेप्टेन्स (डिएए) र लोकल बैंक ग्यारेन्टी सुविधा उपभोग गर्न पाउनेछन् ।
मुक्तिनाथका ग्राहकहरुले आधुनिक बैंकिङ सुविधाहरु उपभोग गर्ने अवसर पाउनेछन् । साथै, दुई बैंक बीच निक्षेप, रेमिट्यान्स, निर्देशित क्षेत्रमा लगानी, सह–वित्तीयकरण कर्जा, विदेशी मुद्रा सम्बन्धि अन्य कारोबार समेत अगाडी बढाउने लक्ष्य राखिएको छ ।
नबिलले यस सहकार्यको माध्यमबाट मुक्तिनाथ विकास बैंकको ग्राहकहरुलाई विस्तारित बैंकिङ सुबिधा प्रदान गर्न पाउँदा खुसी भएको नबिल बैकका प्रमुख कार्यकारी अधिकृत अनिल केशरी शाह बताए । दुबै बैंकका ग्राहकहरुलाई उत्कृष्ट बैंकिङ सेवा सुविधा प्रदान गर्नको लागि नबिल बैंक तत्पर रहेको पनि शाहले बताए ।
वैदेशिक व्यापारमा प्रयोग हुने विभिन्न उपकरणहरु मुक्तिनाथ विकास बैंकका शाखाहरुबाटनै प्राप्त गर्ने भएकाले बैदेशिक व्यापारमा संलग्न ग्राहकहरुलाई समग्र बैकिङ्ग सेवा लिन सुविधा पुग्ने मुक्तिनाथ विकास बैंकका प्रमुख कार्यकारी अधिकृत प्रद्युमन पोखरेलले बताए ।
