ऊर्जा खबर
काठमाडौँ । सामुदायिक ग्रामीण विद्युतीकरणअन्तर्गत पर्साका ९ वटा विद्युत उपभोक्ता समितिले नै नेपाल विद्युत् प्राधिकरणलाई महसुल बुझाएका छैनन् । यी सामुदायिक संस्थाले विद्युत् उपयोग गरेवापतको बक्याैता महसुल नतिरेका हुन् ।
सामुदायिक संस्थाले महसुल नबुझाएपछि बक्यौता बुझाउन आग्रह गर्दै प्राधिकरणले बुधबार सार्वजनिक सूचना जारी गरेको छ । महसुल बक्यौता राख्नेमा पटवा सुगौली गाउँपालिकाको देकुली विद्युत् उपभोक्ता समिति रहेको छ ।
यसैगरी, सखुवा प्रसौनी गाउँपालिकाका देउराली, पारसनाथ, धोबिनी गाउँपालिकाको शिवशक्ति जीवनज्योती र उजाला विद्युत् उपभोक्ता, पाकाहा मैनपुर गाउँपालिकाको धोरे विद्युत् उपभोक्ता समितिले बक्यौता बुझाएका छैनन् ।
कालिकामाई गाउँपालिकाको प्रकाश विद्युत् उपभोक्ता समिति र पोखरिया नगरपालिकाको विद्युत् उपभोक्ता समितिले बक्यौता महसुल नबुझाएको प्राधिकरणले जानकारी दिएको छ ।
प्राधिकरणको वितरण तथा ग्राहक सेवा निर्देशनालय सामुदायिक ग्रामीण विद्युतीकरण विभागले सूचना जारी गर्दै पर्साको पोखरिया वितरण केन्द्र अन्तर्गतका सामुदायिक वितरक संस्थाहरूलाई ३५ दिनभित्र महसुल बुझाउन आग्रह गरेको छ ।
तोकिएको समयावधिभित्र बक्यौता महसुल नबुझाएमा प्राधिकरणको सामुदायिक ग्रामीण विद्युतीकरण विनियमावली २०७१ (संशोधन सहित) को विनियम २८ को प्रावधान बमोजिम कारवाही हुने सूचनामा उल्लेख गरेको छ ।
