ऊर्जा खबर
काठमाडौं । भारतीय कम्पनी टी–पावर ट्रान्सफर्मर एण्ड स्वीचगेयर प्रालिले नेपालमै कम्पनी स्थापना गरी ट्रान्सफर्मर उत्पादन तथा बिक्री–वितरण गर्ने तयारी गरिरहेको छ । हाल डिलरमार्फत ट्रान्सफर्मर बिक्री–वितरण गरिरहेको कम्पनीले ६ महिनाभित्र कम्पनी स्थापना गरी प्लान्ट लगाएर नेपालमै उत्पादन गर्ने तयारी गरिरहेको हो ।
कम्पनीले सन् २०१३ देखि भारतलगायतका ६ भन्दा बढी देशमा ट्रान्सफर्मर बिक्री गर्दै आएको कम्पनीका सिनियर सेल्स म्यानेजर अविनाश सक्सेनाले बताए । अहिले बंगलादेश, युगाण्डा, अष्ट्रिया, दक्षिण अफ्रिका लगायतका देशमा बिक्री गरिरहेको छ ।
कम्पनीले १६ केभीदेखि १० एमभीए क्षमतासम्मका पावर वितरण ट्रान्सफर्मर, ड्राइ टाइप ट्रान्सफर्मर, ओइल कुल्ड ट्रान्सफर्मर, कास्ट सेजिन ड्राइ ट्रान्सफर्मरको उत्पादन तथा बिक्री गर्दै आएको छ । कम्पनीले हालसम्म ३५ हजारभन्दा बढी ट्रान्सफर्मर उत्पादन गरी आपूर्ति गरिसकेको छ ।
कम्पनीले हाल नेपालमा ५०० केभीए, ६३० केभीए र १.२५ एमभीएको ट्रान्सफर्मर वितरण गरिरहेको पनि सक्सेनाले बताए ।
यो कम्पनीले भदौ १५ गतेदेखि १७ गतेसम्म भृकुटीमण्डपमा भएको नेपाल इभी अन्तर्राष्ट्रिय प्रदर्शनीमा सहभागि जनाएको थियो । तीन दिनसम्म चलेको प्रदर्शनीमा अवलाेकनकर्ताले ट्रान्सफर्मरतर्फ चासो देखाएको पनि उनले बताए । अवलाेकनकर्ताले ट्रान्सफर्मरबारे बुझेर सकारात्मक प्रतिक्रिया दिएकाे उनले बताए ।
नेपालमा ट्रान्सफर्मरको बजार बढ्दै गएकाे भन्दै उनले जतिसक्दो छिटो उत्पादन प्लान्ट स्थापना गरी सहज रूपमा नेपाली बजारमा आपूर्ति गर्ने बताए ।
