ऊर्जा खबर
काठमाडौं । नेपाल विद्युत प्राधिकरणले बिजुलीको पोल प्रयोग गर्ने सेवा प्रदायकलाई आगामी पुस ७ गतेभित्र सम्झौता गर्न निर्देशन दिएको छ । प्राधिकरणले संरचनाहरू प्रयोग गर्ने टेलिफोन, केबल टीभी र इन्टरनेट सेवा प्रदायकलाई आगामी ९ दिनभित्र नविकरण र सम्झौता गर्न निर्देशन दिएकाे हो ।
प्राधिकरण वितरण तथा ग्राहक सेवा निर्देशनालयले सूचना सार्वजानिक गरी तोकिएको समयभित्र नियामनुसार सम्झौता नगर्ने, सम्झौता नवीकरण नगर्ने र विद्युतीय संरचना उपयोग गरी भाडा भुक्तानी नगर्ने सेवा प्रदायकलाई कारबाही गर्ने जनाएको छ ।
‘सेवा प्रदायकहरुलाई विद्युतीय संरचना उपयोगका लागि नियमानुसार सम्झौता गर्न बोलाइएको छ,’ ’सूचनामा भनिएको छ ‘सम्झौता गर्न नआउनेलाई प्राधिकरणको नियमअनुसार कारबाही गरिनेछ ।’
प्राधिकरणका अनुसार केही सेवा प्रदायकहरूले अहिलेसम्म भाडा दर भुक्तानी गरेका छैनन् । अब नियमानुसार मात्रै विद्युतीय संरचना सेवा प्रदायकलाई उपयोग गर्न दिइने हुँदा नयाँ सम्झौता तथा नवीकरण गर्ने सेवाप्रदायकलाई अहिलेसम्मको भाडा रकम सबै भुक्तानी गर्न पनि प्राधिकरणले आग्रह गरेको छ ।
सेवा प्रदायकहरूलाई प्राधिकरणसँग सम्झौता नभएसम्म नयाँ लाइन विस्तारको काम नगर्न सूचनामा भनिएको छ । प्राधिकरणले २०७५ मा विद्युतीय पोल र अप्टिकल फाइबरको भाडा दर बढाएपछि सेवा प्रदायकले त्यसको विरोध जनाउँदै भाडा तिर्न अटेर गरेका थिए ।
