खानेपानी र सरसफाइ सुधारका लागि विश्व बैंकले १० अर्ब ऋण दिने

काठमाडौं । विश्व बैंकले नेपाललाई ८ करोड डलर ( १० अर्ब रुपैयाँ बढी) ऋण दिने भएको छ । बैंकले खानेपानी तथा सरसफाई सुधार तथा एकीकृत जलस्रोत व्यवस्थापनको प्रवद्र्धन गर्नका लागि ऋण दिने भएको हो ।

ऋण सम्झौतामा सरकारको तर्फबाट अर्थ मन्त्रालयका सचिव मधुकुमार मरासिनी र बैंकको मल्दिभ्स, नेपाल र श्रीलंकाका राष्ट्रिय निर्देशक फारिस हदाद जर्भोसले हस्ताक्षर गरे ।

आयोजना कर्णाली र सुदूरपश्चिम प्रदेशका रणनैतिक नगर र गाउँपालिकामा कार्यान्वयन गरिनेछ । यी दुवै प्रदेशमा खानेपानी आपूर्ति र सरसफाई सेवाहरूको पहुँच न्यून छ भने गरिबीको दर उच्च हुनुका साथै यी जलवायु परिवर्तनको समेत जोखिममा छन् ।

यस आयोजनाले उक्त दुई प्रदेशका स्थानीय सरकारहरूलाई खानेपानी र सरसफाई सेवाहरू दिगो र प्रभावकारी रूपमा उपलब्ध गराउन सक्षम संयन्त्रहरू विकास गर्न मद्दत गर्ने अर्थ मन्त्रालयले जनाएको छ ।

अति आवश्यक खानेपानी आपूर्ति र सरसफाइ सेवाहरू उपलब्ध गराउने र अति जोखिममा परेका समुदायहरूलाई पानीको सुनिश्चित गर्न तथा खानेपानी सेवाको स्तरलाई प्रवद्र्धन गर्न यसले मद्दत गर्ने अर्थ मन्त्रालयका सचिव मरासिनीले बताए ।

यस आयोजनाले नगरपालिकाको क्षमता अभिवृद्धि गरी स्थानीय तहमा खानेपानी र सरसफाइ सेवाको आपूर्तिलाई सुदृढ गर्न मद्दत गर्ने हदाद–जर्भोसले बताए । उनका अनुसार नेपालको आर्थिक प्रगति र हरित, उत्थानशील तथा समावेशी विकास हासिल गर्नमा खानेपानी र सरसफाइ पूर्वाधारमा रहेको महत्वपूर्ण कमीलाई समेत सम्बोधन गर्नेछ ।

यस आयोजनाले उक्त दुई प्रदेशका स्थानीय सरकारहरूलाई खानेपानी र सरसफाइ सेवाहरू दीगो र प्रभावकारी रूपमा उपलब्ध गराउन सक्षम संयन्त्रहरू विकास गर्न मद्दत गर्ने विश्व बैंकले जनाएको छ ।