ऊर्जा खबर
काठमाडौँ । नबिल बैंकले मानव सेवा आश्रमलाई २ थान उद्धार वाहन उपलब्ध गराएको छ । काठमाडौँ बाेहोराटारमा रहेको मानव सेवा आश्रमलाई मंगलबार एक विशेष समाराेहका बिच बैंकले दुई वाहनहरू हस्तान्तरण गरेकाे हो ।
नबिल बैंकका अध्यक्ष उपेन्द्र पौड्याल, सञ्चालक निर्वाण चौधरी, प्रमुख कार्यकारी अधिकृत (सीईओ) ज्ञानेन्द्रप्रसाद ढुंगाना र नायब प्रमुख कार्यकारी अधिकृत मनोजकुमार ज्ञवालीले संयुक्त रूपमा गाडीको साँचो आश्रमका अध्यक्ष रामजी अधिकारीलाई हस्तान्तरण गराएका हुन् ।
बैंकका सीईओ ढुंगानाले नबिल बैंक सधैँ मानव सेवाका कार्यमा तयार रहेको तथा उनले मानव सेवा आश्रमलाई सहयोग गर्न पाउनु समाजप्रतिको दायित्व भएको र भविष्यमा पनि यस्ता कार्यमा साझेदारी गर्न नबिल बैंक इच्छुक रहेको उनले बताएका छन् । नायब प्रमुख कार्यकारी अधिकृत ज्ञवालीले मानव सेवा आश्रमले बेसहारा बनेका मानिसहरूलाई खाना, सुरक्षा, र स्वास्थ्य जस्ता न्यूनतम मानव अधिकार सुनिश्चित गर्ने अभियानमा नबिल बैंक साझेदार हुन पाउँदा खुसी लागेको बताए ।
२०६९ सालदेखि सञ्चालनमा आएको मानव सेवा आश्रमले ७ प्रदेशमा सेवा केन्द्र विस्तार गरी ७ हजारभन्दा बढीलाई आश्रय दिँदै आएको छ । यस संस्थाले सडक पेटी तथा सार्वजनिक स्थलमा बेवारिसे जीवन बिताउन बाध्य व्यक्तिहरूको उद्धार, उपचार, र पालनपोषणका कार्यहरू दाताहरूको आर्थिक सहयोगबाट गर्दै आएको छ ।
आश्रमलाई नबिल बैंकको सहयोगले सेवाको गुणस्तर र गति बढाउन महत्त्वपूर्ण योगदान पुर्याउने समेत अध्यक्ष अधिकारीले बताएका छन् ।
