ऊर्जा खबर
काठमाडौँ । एनएमबि बैंक लिमिटेडले नेपाल र भारतबीच सहज एवम् द्रुतरूपमा रकम स्थानान्तरण गर्न मिल्ने गरी नयाँ 'इन्डो–नेपाल रेमिट्यान्स' सेवा सञ्चालनमा ल्याएको छ । नेपाल क्लियरिङ हाउस लिमिटेडसँगको प्राविधिक सहकार्यमा बैंकले यो सेवा सुरु गरेको हो ।
यस सेवाको सुरुवातसँगै अब भारतबाट नेपालमा र नेपालबाट भारतमा पैसा पठाउने कार्य पहिलेभन्दा सुरक्षित, भरपर्दो र झन्झटमुक्त हुने बैंकले विश्वास लिएको छ ।
भारतबाट पैसा पठाउनासाथ बैंकमा रहेको व्यक्तिगत खातामा वास्तविक समयमै रकम जम्मा हुने जनाइएको छ । अब पैसा मगाउन वा पठाउन लामो बैंक खाता नम्बर सेयर गरिरहनु पर्ने छैन । साथै, बैंकले सुरक्षाका लागि छुट्टै भर्चुअल ठेगाना उपलब्ध गराउने छ, यसकै आधारमा कारोबार गर्न सकिने छ ।
बैंकका अनुसार ग्राहकले बैंकको मोबाइल बैंकिङ एप वा आधिकारिक वेबसाइटमार्फत आफैँ यो सेवा प्रयोग गर्न सक्नेछन् । साथै, बैंकका शाखाहरूमा पुगेर पनि कर्मचारीको सहयोगमा सेवा लिन सकिने व्यवस्था मिलाइएको छ ।
व्यक्तिगत प्रयोजन वा घरखर्चका लागि भारतबाट पैसा मगाउने ग्राहकलाई लक्षित गर्दै ल्याइएको यो सेवामा सुरक्षालाई उच्च प्राथमिकता दिइएको छ । ग्राहकको रकम सुरक्षित रहोस् भन्नका लागि बैंकको आन्तरिक प्रणालीले निरन्तर निगरानी गर्ने बैंकद्वारा जारी विज्ञप्तिमा उल्लेख छ ।
हाल एनएमबि बैंकले देशभर रहेका १९८ शाखा, १७६ एटिएम र ९ एक्सटेन्सन काउन्टरमार्फत आफ्ना ग्राहकलाई आधुनिक बैंकिङ सेवा प्रदान गर्दै आइरहेको छ ।
.jpg)
