ग्लोबल आइएमईको नयाँ एक्सटेन्सन काउन्टर थप

काठमाडौं । ग्लोबल आइएमई बैंकले नयाँ एक्सटेन्सन काउन्टर थप गरेको छ । बैंकले लमजुङ जिल्लाको दोर्दी गाउँपालिकाको हिले बजारमा नयाँ काउन्टर थप गरेको हो । काउन्टरबाट सोमबार (चैत २१ गते) देखि सेवा सुरु भएको छ ।

काउन्टरको उद्घाटन गाउँपालिकाको अध्यक्ष ओमबहाखुर गुरुङ्ग र उपाध्यक्ष दिलबहाखुर घलेले गरेको बैंकले जनाएको छ । बैंकका अनुसार एक्सटेन्सन काउन्टर सुरु भएसँगै काउन्टरको संख्या ५० पुगेको छ । 

बैंकलाई ग्रामीण क्षेत्रमा सेवा विस्तार गर्न आवश्यक सहयोगका लागि आफु तत्पर रहेको अध्यक्ष गुरुङ्गले बताए । साथै, उपाध्यक्ष घलेले एक्टेन्सन काउण्टर सञ्चालन गरेकोमा बैंकलाई धन्यवाद व्यक्त गर्दै ग्रामीण क्षेत्रमा वित्तीय साक्षरता वृद्धि गर्नका लागि बैंकको सहयोग आवश्यक रहेको बताए ।

वडा अध्यक्ष तुलबहादुर घलेले काउन्टर सञ्चालन गर्दा गाउँपालिकाका वडा नम्बर ६, ७, ८ र ९ र बेशीशहर नगरपालिकाका केही बासिन्दाहरु बैंकिङ्ग सेवाबाट लाभान्वित हुने बताए । बैंकले मुलुकभर २८८ शाखा, २७४ शाखारहित बैंकिङ्ग सेवा, २५६ एटीएम तथा ३ वटा वैदेशिक प्रतिनिधि कार्यालयमार्फत २८ लाख भन्दा बढी ग्राहकलाई सेवा प्रदान गर्दै आएको छ ।