ऊर्जा खबर
काठमाडौं । रुसले युक्रेनस्थित युरोपकै सबैभन्दा ठूलो आणविक ऊर्जा केन्द्र नियन्त्रणमा लिएको छ । रुसी सेनाले लगातारको बमबारीपछि विद्युत उत्पादनका लागि निर्माण भएको जापोरिज्जिया आणविक ऊर्जा केन्द्र नियन्त्रणमा लिएको हो ।
रुसी सेनाको आक्रमणका क्रममा यो आणविक ऊर्जा केन्द्रमा आगो लागेको थियो । अहिले आगो निभइएको र आणविक ऊर्जा केन्द्र रुसी सेनाको नियन्त्रणमा गएको युक्रेनी अधिकारीको भनाइ उदृत गर्दै अन्तर्राष्ट्रिय सञ्चार माध्यमहरूले जनाएका छन् ।
आगलागी भएको केही घन्टाभित्र आणविक ऊर्जा केन्द्र रुसी सेनाको नियन्त्रणमा गएको समाचारमा जनाइएको छ । पश्चिमी शक्ति राष्ट्रहरूले ठूलो आणविक ऊर्जा केन्द्रमा भएको आक्रमणको निन्दा गरेका छन् ।
युक्रेनको इनरहोडार सहरमा रहेको यो विश्वका १० मध्ये १ र युरोपकै सबैभन्दा ठूलो आणविक ऊर्जा केन्द्र हो । रुसी सेनाको लगातारको गोलाबारीबाट आणविक ऊर्जा केन्द्रको भवन र युनिटमा आगलागी भएको थियो ।
रुसी सेनाले ट्याङ्क तथा गोलाबारीका बमसहित युक्रेनी सहरमा प्रवेश गरी आणविक ऊर्जा केन्द्र नियन्त्रणमा लिएको हो । आक्रमण गरेको केही समयमा नै उक्त आणविक ऊर्जा केन्द्र रुसी सेनाको नियन्त्रणमा गएको समाचारमा जनाइएको छ ।
युक्रेनमा अहिले जापोरिज्जियासहित ४ वटा आणविक ऊर्जा केन्द्र सञ्चालनमा छन् । जापोरिज्जियाको जडित क्षमता ५ हजार ७ सय मेगावाट छ । यो आणविक ऊर्जा केन्द्रमा ९५० मेगावाटका ६ वटा उत्पादन युनिट छन् ।
६ मध्ये ५ वटा युनिट सन् १९८५ देखि १९८९ को बीचमा सञ्चालनमा आएका हुन् । छैटौं युनिटले सन् १९९५ बाट उत्पादन सुरु गरेको हो । यो आणविक ऊर्जा केन्द्रले युक्रेनको करिब ५० प्रतिशत विद्युत माग धान्दै आएको थियो ।
अन्तर्राष्ट्रिय समाचार एजेन्सीहरूको सहयोगमा अनुवाद
