ऊर्जा खबर
काठमाडौँ । लमजुङको मस्याङ्दी गाउँपालिका–६ मा निर्माणाधीन सुपर न्यादी जलविद्युत आयोजनाको प्रसारण लाइन निर्माणका लागि अनुमति प्रक्रिया अघि बढेको छ । आयोजनाको प्रवर्द्धक कम्पनी सिउरी न्यादी पावर लिमिटेडले उक्त प्रसारण लाइन निर्माण अनुमति पत्रका लागि विद्युत् विकास विभागसमक्ष आवेदन दिएको छ ।
आयोजनाको स्विचयार्डदेखि सोही गाउँपालिकामा रहेको न्यादी जलविद्युत् आयोजनाको स्विचयार्डसम्म जम्मा ५.०९९ किमि लामो १३२ केभी सिङ्गल सर्किट प्रसारण लाइन निर्माण गर्न प्रस्ताव गरिएको हो । प्रस्तावित लाइनबाट ४०.२७ मेगावाटसम्म विद्युत् प्रसारण गर्न सकिने जनाइएको छ ।
प्रस्तावित प्रसारण लाइन निर्माण तथा सञ्चालन गर्दा उल्लेखनीय प्रतिकूल असर पर्ने भए सूचना प्रकाशित भएको मितिले ३५ दिनभित्र विभाग वा प्रवर्द्धक कम्पनीमा आफ्नो लिखित राय प्रतिक्रिया दिन विभागले आग्रह गरेको छ ।
प्रसारण लाइनअन्तर्गत १४ वटा टावरहरू निर्माण गरिनेछन् । टावरको उचाइ अधिकतम ३५ मिटरसम्म रहने तथा टावरहरू बीचको दूरी ७०५,३२ मिटरदेखि ६५१.८७ मिटरसम्म हुनेछ ।
आयोजना निर्माणका लागि कुल ९.५१६ हेक्टर जमिन आवश्यक पर्नेछ, जसमध्ये १४ वटा टावरका लागि स्थायी रूपमा जम्मा ०.०२३ हेक्टर जग्गा आवश्यक पर्दछ । यसबाहेक विद्युत् मार्गको अधिकार क्षेत्रअन्तर्गत ९.१७९ हेक्टर जग्गा आयोजनालाई आवश्यक पर्नेछ ।
प्रसारण लाइन निर्माणको काम १० महिनाभित्र सक्ने लक्ष्य रहेको छ ।
