ऊर्जा खबर
काठमाडौँ । नेपाल विद्युत् प्राधिकरणले आफ्नो ४०औँ वार्षिकोत्सवको अवसरमा देशैभर वृक्षारोपण गरेको छ । प्राधिकरणका देशभरका कार्यालयले आ–आफ्ना क्षेत्रमा गरी साउन १५ गते कुल १० हजारभन्दा बढी बिरुवा रोपिएको हो ।
प्राधिकरणका अनुसार वार्षिकोत्सव समारोह मूल प्रबन्ध समिति–२०८२ अन्तर्गतको प्रचार प्रसार उपसमितिको संयोजनमा भक्तपुरस्थित तालिम केन्द्र परिसरमा वृक्षारोपण गरिएको छ । ऊर्जा, जलस्रोत तथा सिँचाइ राज्य मन्त्री खमबहादुर गर्बुजाको उपस्थितिमा उक्त केन्द्रमा विभिन्न प्रजातिका फलफूलका करिब १ सय वटा बोटबिरुवा रोपिएका छन् ।
विद्युत्का उत्पादन, प्रसारण तथा वितरण संरचना निर्माण गर्ने क्रममा हुने गरेको रुख कटानबाट पर्यावरणीय सन्तुलनमा पर्ने असर कम गर्न वृक्षारोपण गरेको हो ।
पर्यावरणको रक्षा गर्दै विकासलाई सन्तुलित रूपमा अघि बढाउन हरेक वर्ष वार्षिकोत्सवको अवसर पारेर साउनको १५ गते वृक्षारोपण गरिँदै आएको प्राधिकरणले जनाएको छ ।
