ऊर्जा खबर
काठमाडौं । भोजपुरमा निर्माण सम्पन्न ८ मेगावाटको टक्सार पिखुवा खोला जलविद्युत आयोजना राष्ट्रिय प्रसारण प्रणालीमा जोडिएको छ । टक्सार पिखुवा हाइड्रो पावर कम्पनीले निर्माण गरेको आयोजना चैत १४ गतेबाट राष्ट्रिय प्रसारण प्रणालीमा जोडिएको हो ।
अहिले परीक्षण उत्पादन चलिरहेको आयोजनाका मेकानिकल इन्जिनियर रमेशरत्न स्थापितले बताए । ‘नेपाल विद्युत प्राधिकरणको प्राविधिक टोली आएर आयोजनाको विद्युत प्रसारण प्रणालीमा जोडिदियो,’ उनले ऊर्जा खबरसँग भने, ‘एक साता भयो परीक्षण उत्पादन चलिरहेको छ ।’
उनले आयोजनाबाट अबको एक सातामा व्यापारिक उत्पादन सुरु गरिने बताए । निर्माण सुरु भएको साढे २ वर्षमा आयोजना सम्पन्न भई विद्युत उत्पादन सुरु भएको हो ।
आयोजनाको विद्युत साढे ७ किलोमिटर दुरीमा रहेको पानीट्यांकी सबस्टेसनमा जोडिएको छ । सबस्टेसनसम्म आवश्वक प्रसारण लाइन कम्पनीले आफैं निर्माण गरेको छ ।
यो आयोजना सम्पन्न गर्न १ अर्ब ७२ करोड रुपैयाँ खर्च भएको छ । आयोजनामा सिटिजन्स (अगुवाई) र माछापुच्छ«े बैंकले ऋण लगानी गरेका छन् । आयोजनाको कूल लागतको ७० प्रतिशत बैंकको ऋण लगानी छ । ३० प्रतिशत स्वपुँजी लगानी छ ।
