ऊर्जा खबर
काठमाडौं । संखुवासभाको पिलुवा खोलामा निर्माण सम्पन्न भएको ४.७२ मेगावाट विद्युत राष्ट्रिय प्रसारण प्रणालीमा जोडिएको छ । मेन्छियाम हाइड्रो पावर लिमिटेडले जिल्लाको चैनपुर नगरपालिकामा निर्माण सम्पन्न गरेको आयोजनाको विद्युत प्रणालीमा थपेको हो ।
बुधबार (पुस १३ गते) हाइड्रोपावरका अध्यक्ष दीपक खड्का र नेपाली कांग्रेसका केन्द्रिय सदस्य एंव प्रतिनिधिसभाका सांसद विनोद चौधरीले चैनपुरमा आयोजित कार्याक्रममा आयोजनाको औपचारिक उद्घाटन गरेका थिए ।
आयोजनाको काम यसअघि नै सम्पन्न गर्ने योजना भएनि कोरोना महामारीका कारण निर्माणमा केही ढिला भएको खड्काले बताए । आयोजनाको काम निर्माण सुरु भएको ६ वर्षमा सम्पन्न भएको हो । ‘अहिले आयोजना प्रभावित स्थानीयवासीलाई साधारण सेयर निष्कासन गर्ने तयारी भइरहेको छ’ उनले भने ।
आयोजनाको क्षमता ४.७२ मेगावाट भएपनि ५.२ मेगावाटसम्म उत्पादन गर्न सकिने इन्जिनियर विकल थापाले बताए । आयोजना १ अर्ब ३१ करोड लगानीमा निर्माण सम्पन्न भएको हो । कम्पनीको ७.७ मेगावाटको माथिल्लो पिलुवा–१ पनि निर्माणाधीन छ ।
