ऊर्जा खबर
काठमाडौँ । ग्लोबल आइएमई बैंकलाई विश्व बैंक समूहको सदस्य अन्तर्राष्ट्रिय वित्त निगम (आइएफसी) ले परामर्श सेवा दिने भएको छ । बैंकलाई आइएफसीले जोखिम व्यवस्थापन, जलवायु वित्त तथा लैङ्गिक वित्त क्षेत्रका परामर्श सेवा दिने विषयमा दुई संस्थाबीच समझदारी भएको हो ।
समझदारी अनुसार आईएफसीले बैंकको कर्जा, सञ्चालन र बजार जोखिम तथा सम्पत्ति र दायित्व व्यवस्थापनलाई सुरक्षित गर्न परामर्श दिने, बैंकको जोखिम व्यवस्थापन नीतिलाई अन्तर्राष्ट्रिय स्तरमा कायम जोखिम व्यवस्थापन अभ्यास अनुरुप परिमार्जन गर्ने लगायतका विषयमा परामर्श प्रदान गर्ने छ ।
समझदारी पत्रमा ग्लोबल बैंकका प्रमुख कार्यकारी अधिकृत रत्नराज बज्राचार्य तथा आइएफसीका दक्षिण एसिया क्षेत्रीय सल्लाहकार तथा अपस्ट्रीम प्रबन्धक मेहदी चेरकाउई बीच हस्ताक्षर कार्यक्रम सम्पन्न भएको हो ।
आईएफसीले जलवायु वित्त क्षमता निमार्णका लागि आधारभूत जलवायु साक्षरता तथा लक्षित क्षमता निर्माणका लागि दक्षता अभिवृद्धि कार्यक्रम सञ्चालन गर्नेछ ।
साथै आईएफसीले ग्लोबल आइएमई बैंकलाई स्वच्छ यातायात, जलवायु–स्मार्ट कृषि र सौर्य परियोजनाहरू लगायत अन्य विभिन्न क्षेत्रको जलवायु वित्तमा पहुँच बढाएर नेपालमा सो परिवर्तनको प्रभाव न्यूनीकरणका प्रयासमा पनि परामर्श दिनेछ ।
