ऊर्जा खबर
काठमाडौं । पाँचथर र ताप्लेजुङ जिल्लाकाे काबेली खोलामा २५ मेगावाटको काबेली बी–१ जलविद्युत अयोजना निर्माण गरी सञ्चालनमा ल्याएको अरुण काबेली पावर कम्पनी लिमिटेडको ४ करोड रुपैयाँले नाफा घटेको छ । कम्पनीले सार्वजानिक गरेको गत आर्थिक वर्ष २०७८/७९ को वित्तीय विवरणमा नाफा घटेको देखिएको हो ।
यस अवधिमा ४ करोड २ लाख ५० हजार १ सय ३९ रुपैयाँले नाफा घटेको कम्पनीले जनाएको छ । कम्पनीका अनुसार अघिल्लो आर्थिक वर्ष २०७७/७८ मा २८ करोड ९७ लाख ९१ हजार ७ सय रुपैयाँ खुद नाफा कमाएको थियो भने गत आवमा २४ करोड ९५ लाख ४१ हजार ५ सय ६१ रुपैयाँ नाफा कमाएको छ ।
कम्पनीको खुद नाफा घटे पनि विद्युत बिक्री बाट हुने आम्दानी भने अघिल्लो आवको तुलनामा बढेको छ । कम्पनीले गत आर्थिक वर्षमा विद्युत बिक्री गरी ७५ करोड १० लाख ९९ हजार ३ सय २ रुपैयाँ आम्दानी गरेको छ । अघिल्लो आवको यही समय अवधिमा ७० करोड ६७ लाख ६ हजार ८ सय ३६ रुपैयाँ आम्दानी गरेको थियो ।
कम्पनीको अन्य स्रोतको आम्दानी अघिल्लो आवको तुलनमा घटेको छ । अघिल्लो आवमा कम्पनीले अन्य स्रोतबाट २ करोड ६ लाख २१ हजार ६ सय ४३ रुपैयाँ आम्दानी गरेको थियो भने गत आवमा ४ लाख ७८ हजार ८ सय ५३ रुपैयाँ मात्र आम्दानी गरेको विवरणमा उल्लेख छ ।
कम्पनीको २५ मेगावाटको काबेली बी–१ जलविद्युत आयोजना सञ्चालनमा छ । यो आयोजनाले निरन्तर विद्युत उत्पादन गरिरहेको छ ।
.jpg)
